انسى!!؟؟ 2024

هذا دمعي على فرقاك اذا تشوفه تقول بحور..دمع اغرق عيوني وخطر انه يعميها..

تظن اني بهجرانك انا مبسوط انا مسرور..انا والله الفرحه مادري وين اراضيها..

انا حاطتني الدنيا احزان بشكل السور..انا الآهات..انا الشكوى انا الغربه بمعانيها..

ابد ياخلي ماجا منك اي قصور..والتجريح والقسوه ابد منت راعيها..

بس الزمن ياخلي قام فيني يدور..والدنيا ياغالي ورتني بلاويها..

وخلتني ازيد الكسر على خاطر مكسور..واقول انسى يافلان من كنت تغليها..

لجل اني صرت بالاحزان انا مغمور..ولا ابيك ابد احزاني تحس فيها..

على صدرك ياكم بكيت وانا مقهور..وبحنانك شموع الافراح تضويها..

وياكم شكيت لك عن الظلم والجور..وبكلمه من اشفاهك اوجاعي ارميها..

حب صادق ياقلبي يحويك بلا زور..تفضل ورده المشتاق لعيونك اهديها..

ورده تفضح اسرار عاشق مبهور..اسرار غرام لك فضل انه يخفيها..

مادري دلع ولا عناد ولا غرور..طبيعتي معاك مادري شسميها..

انا لو يمر دهور ورى دهور..عشرتي وياك ماني بناسيها..

وترى الحب مهما طال ابد مايبور..بس صرت لغيري عساك تهتني فيها..

بزفك معها من دون شعور..وازف الفرحه والحنها واغنيها..

وارش الورد مع زهوره وارش عطور..واجي لمها واسلم عليها واهنيها..

واوصيها ترى((…..))قلبي المبتور..ولو عشرته تنباع لاغالي به واشريها..

ياقلبي ترى قلبي معاك مأسور..لاتفكر بزيارته..اعرفك تسويها..

جا يمك يشكي الغربه من شهور..ويشكي جروح تدور من يداويها..

واذا بيوم مر طيفي عليك مرور..ابيك تقول عسى ربي يشفيها