كان يامكان في ايام الاسبوع وانا اتصفح في النت الا والجوال يرن رن رن وشوفه الا جارتي وهي اختي الي امي ماخلفتها وعلى طول ارد هلا وغلا بالغاليه وانا مبسوطه 
المهم قالت يابنت حريم الحاره دقو يقولون الجمعه عندك يعني دورية الحاره وقامت تعد وطلع عددهم اكثر من تسع وانا ساكته متفاجئه 
لان فيهم حريم ماعرفهم بس بالاسم مع الحريم المهم قلت لها تم واقفل منها وطيران على المطبخ احوس ولوس بين الصواني والمواعين والمقاضي
اول شي سويته المعمول لاني اقدره والمقادير 
2 اصبع زبده لينه..6حبات جبن كيري..ثلاثه ارباع الكاس سكر بودره منخول..تخلطينهم زين مع بعض بعدين تحطين عليها كاسين ونص دقيق كويتي وتعجن زين مازين مع بعض و احشيه انا حطيت مع التمر شوي زبده وبهارات المعمول الي انا استخدمها احط في الخلاط ملعقه من المحلب واليانسون وشمر وحبة البركه وطحنهم واحط الكميه الي ابي وبدا احشي وكور وصفها في الصينيه وعلى طول ادخلها الفرن ماتطول ترى انتبه وتحمر من تحت وفوق
الحين انتهيت من المعمول اروح للعجينه علشان الوقت ويمديها تختمر وهذي ياطويلات العمر والسلامه معتمدتها من السنين المقادير في الخلاط الكاس 2بيض ..4ملاعق حليب بودره..بيالة زيت..فنجان سكر..ملعقه خميره..كاس مويه..اخليها تخلط 5 دقايق واكون حاطه في باديه 3 اكواب دقيق كويتي وملعقه بكنج بودر واحط الخليط عليها واعجنها زين انا صراحه في العجانه اخليها من 5 الى 10 دقايق تعجن ترها لينه مو قاسيه بس اذا احتجتي كم قطره زيت وتركيها تختمر انا طريقتي اذا كنت مستعجله اكون مشغله المكرويف وانا اعجن علشان تختمر بسرعه العجين الحين غطيتها وخليتها
ونتهيت من هم الفطاير اجي للكيك وهو ملك السفره والجمعه وعلى طول في الخلاط 4 بيض ..2 ملعقه بكنج بودر..نص كاس حليب بودره 1 كاس سكر..نص كاس زيت..1 كاس مويه..بعد ماخلطها زين اخلطها مع 2 كاس دقيق وعلى طول في صينيه مدهونه ودخلها الفرن اليت استوت وتحمرت اول ماطلعتها من الفرن صبيت عليها حليب نستله ورشيت فوقها قرفه مطحونه
الحين خلصت من الكيك اجي للبسبوسه والمقادير 1 قشطه..ملعقه فانيليا..6ملاعق حليب بودره..1كاس سكر..ربع كاس جوز الهند..1 كاس مويه 1 ونص سميد..بيالة زيت..اخلطها وصبها في الصينيه وزع على الوجه انصاف الوز ودخلها الفرن والشيره حطيت معها رشة فانيليا اول ماطلعتها اسقيتها وقطعتها وعلى جنب
اجي للفطاير وبدا اشكلها سويت بيتزا.. كورسان..حلزونيه..خليه..وحشيتها الخليه جبن والحلزونيه تونه مكشنه والكورسان جبن وزعتر والبيتزا اكيد كشنته الطماطم المسبكه وفلفل رومي وشرايح الزيتون وفطر وجبن مبشور كرفت مافيه احلى منه…… وسويت فطاير الي في الاله على شكل ورده عجينتها 2كاس دقيق ..اقل من النص بشوي كاس زيت ..1بيض..ملعقه خميره ..رشة ملح..نص فنجان سكر …والمويه على حسب العجين بصراحه ماقدرة وكلها تخلطينها سوى في العجانه ولا بيدك عادي وخليها تختمر نص ساعه… وبديت اكورها اكبر من الخليه بشوي واحطها بالاله الين تحمر وقصها من النص تسير عندي قطعتين وفتحها من النص بسكين علشان الحشوه وصفها في صحن الين انتهت الكميه الحشوه كانت عباره عن دجاج سلقته وكشنته عادي بابصل وثوم وفلفل رومي وماجي وجزر مبشور ورشه من الفلفل الاسود والكمون المطحون…قطعت خس وملفوف شرايح رقيقه وحطيت معها ملعقه مايونيز وحطيتها فوق الحشوه وبديت احشيها واصفها في صحن التقديم وغلف وابدا اصف الي سويته واغلفه على طول واجهز زمزميات القهوه والشاي ونعناع وقهوة الشعير والفناجين والبيالات والتمر ورطب وجهز سفرتي
دخلت المطبخ الساعه وحده الظهر وطلعت المغرب بس اكيد وقت الصلاه اخذ بريك اصلي وارجع الحمدلله جهزت كل شي بدري وطيران على غرفتي اجهز نفسي واكشخ وادق على جارتي اقولها يالله تعالو احتريكم وسمرنا الين الساعه 11الليل بس صدق وناسه وسعة صدر يوه نسيت اسفه بس والله ماعرفت انزل الصور علشان كذا بديت اكتب وشرح بدون صور يابنات كل الي كتبته معتمدته من سنين جربوها واكيد بتضبط معاكم من اول مره ولا تنسوني من صالح دعاكم ولكم بالمثل وهالله هالله بردود الي تطيب الخاطر واول مشاركه الي معكم مبسوطه من انجازي استودعكم الله الذي لا تضيع ودائعه
واهم شي انبستطوا و وسعتوا صدوركم ^_^
مبين عليك طباخه ماهره ماشاء الله تبارك الرحمن
ان شاء الله يستفيدوا الصبايا منها مثل ما استفدت ^^
نورتي القسم عسوله بطباخاتك المميزة,,
بانتظار جديدك
مبينة سنعة تبارك الله..~
ربنا يحفظك يا حلوة..و اكيد استفدنآ من طبخآتك الحلوة تبارك الله ..~
كلك ذوق عسولة..منورة مطبخنآآ..~
تستآآهلي تقييم على امتاعي بما قرأت..~
لك ودي..~
ماقصرتي يعطيك العافيه
مبينة سنعة ماشاء الله عليك
ذكرتيني يوم يجون عندي صديقاتي
اسوي اغراضي وجهز سفرتي قبل المغرب
بارك الله فيك اختى الغالية
ودمتى فى حفظ الله ورعايته
لك كل ودى وحبى
على كلامك تسلم اناملك وعلى مرورك ………..,
سما روح اسعدني مرورك وتسلم اناملك على كلامك الحلو تقبلي تحياتي, ماشاء الله عليك
بصراحة منك نستفيد
وبانتظار اطباقك الجديدة
ام هتاآن
على طبخاآتك الحلوة واحلى مافي الجمعاآت السواليف والوناآسة
نتشوق لكل جديدك
دمتي بخيروعاآفية
,,