الوسم: العزيزه

وتحب ان تطبق ذلك على زوجها وفي بيتها …

هذه تنصح باشعال الشموع اول ما يدخل البيت …
والثانية تقص قصتها لما لبست كذا وكذا لزوجها .. الذي جن من الاغراء والجو الرومانسي ..

واخرى كيف انها فاجئت زوجها بعيد ميلاده بشوية بالونات – وموسيقى والذي منه

الى اخر فناتق البنات واختراعاتهم

تجي حبيبتنا وتطبق الفكرة على ريلها – وباجر تنزل موضوع من نوع

"لحقوا علي – زوجي كسر فيني "

وتحكي كيف ان زوجها لم يعبرها وهي التي ارادت مفاجئته – وعملت له كذا وكذا – ولبست له كذا وكذا

وببساطه هو … ولا عبرها اصلا

والثاني قال لزوجته " شنو هالخبال "؟؟

يا حبيبتي يا غلاتي – شوي فتحي عقلج معاي

لازم تعرفين شخصية زوجج – وشنو اللي ممكن يتقبله – وشنو اللي ممكن يونسه من بين هالافكار – وشنو اهتماماته

صحيح ان الفكره اللي قرأتيها يمكن تكون حلوة بالنسبة لج …
بس يمكن تكون سخيفه بنظر زوجج ..
او تخالف اهتماماته ..

يعني قرأت لبنت تقول انها ارسلت لزوجها في ديوانيته في البيت – وفاجئته بليله رومانسية سريعه سافرت به الى المريخ – ورجع لربعه وهو مبسوط

تخيلي ان زوجك قبلي – ومجابل ضيوف في الديوانية – وزايرينه ضيوف من بره – ويسولف معاهم سالفه مهمه – وموجبهم ..
وحضرتج مطرشه له رساله تعال ابيك ضروري – والا حضرتج مجهزة له مفاجئة لابسه كذا وكذا (والا مو لابسه) .. وشابه شموع .. ومعطره الغرفة .. يعني مفاجئة حلوة !!!

ما راح اللومه – اذا صكج كف وطلع …
يعني هذا وقته ؟
وهذي ظروف تنادين فيها بو الشباب مسويتله مفاجئة ؟؟

انا هنا فقط اضرب مثلا …
ولا يعني ان هذه كل الحكاية

اقول انتبهي لما تريدين ان تفعليه لزوجك .. فلا تقلدين تقليد اعمى دون تفكير بالظروف وما يدور حولك
والاهم ان تعرفي اهتمامات زوجك ..

فلا يعقل ان تطلبي منه مالا يحب او مالا يرغب او مالا يشكل له اهتماما …

ولا يعقل ان تأتي بعد عشرين سنة زواج .. ومسويتله مفاجئة مالت بنت ام 18 سنة توها متزوجه !!!!

يعني ثقلي – ثقلي يا قلبو

لا تصير مثل ما يقولون – بقيناها طرب صارت نشب ..
فليست ظروفك كظروف تلك التي كتبت عن الليله الحمراء التي اعدتها لزوجها .. فلا تجعلي ليلتك سوداء من صنع يدك …..

……………………… وتبقى مجرد وجهة نظر !!
——————————————————————————-

–