من القصايد اللي تعيبني
الجادل المترفه والمايس الغضه
مفتاح باب القصيد ونور الالحاظي
قريحة تجمع الهاجوس وتفضه
واليا ذبحها الضما تارد على حياضي
واللي بناه الخيال الواقع يقضه
لو كذب الشاهد ولو صدق القاضي
والبارحه من ذهب واليوم من فضه
والصبح براق رزقه مابعد ناضي
ياصاحبي لا تلح رضاي وتلضه
قبل المرض ينتشر وتزيد الامراضي
مناكب الارض مزحومه ومكتضه
وفجوجها للرجال طوال واعراضي
والوقفه الضايعه والهرجه الفضه
ماهيب من طبعي وماهي من ألفاظي
وعن بعض الاشيا أكف الطرف وأغضه
لاعود الهرج فوق وتحت الانقاضي
أتعب على الطيبه والناجد أعضه
والحاضر أعانقه وأودع الماضي
والرفقه اللي وراها ميله وجضه
فتالها مايبي في الفتل نقاضي
كل على فاله وكل على حظه
واللي تجي فاضيه ترجع على الفاضي
الشاعر // مبارك بن عيينان
لا اله الا الله محمد رسول الله