اللي تبي تتواصل مع جويل تدخل
——————————————————————————–
معليش العنوان طويل لكن المخرج عايز كيده
اسفه لازم اختار موضوع جذاب …
تنويه
انتشرت الحملات التوعويه على سطح الأرض ومن خلال الشبكة العنكبوتيه بشكل كبير في الأيام الاخيره مثل انتشار لوحات زين عالم جميل إنت الأزين في كل قرنه بالشارع .. على انتشار الحملات إلا ان تكريس حمله لتوعية الحريم من النادر مانشوفه وهذا مايجعل عدد الانتحاريات يزداد أكثر وأكثر ..! ومن هذا المنطلق راح ننطلق بحملة توعية خاصة بالحريم ومن نوع آخر برعايتنا ومعكم بس ياحلوين
بعض الحريم عندهن ( عقده ) من التلفزيون .. حتى لو ماكانت هذه العقدة موجودة .. ممكن تجيك هالعقده بعد العرس .. وهذا حاصل كثير .. خاصة لما تجلس المره مع رجلها في الصالة.. وتبى تسولف معه لكن هو معطيها الخامس ..! فاتح على قناة ام بي سي.. ومسوي نفسه ( هامور وهو حامور أصلا ) متابع الاسهم.. وهو بالحقيقه فاغر مع المذيعة ويقول في نفسه إيه هذا الزين مهوب الخشبه اللي جنبي ..! <- من زينك انت وخشتك عاد
وانا اقولك..اقسم بالله انتي جميلة بس ترفقي بحالك يا اختي لاتطمسي مواطن الجمال لتتحولي من ( فتاة ) الى ( عصاة مكنسة متحركة ) >>لابوك فشلتينا بين العربان ترى الدعوى مهي كذا .
سيدتي.. بهالموضوع راح نقدم لك كل النصايح الخاصه بجمالك "المخفي " نعم المخفي ..! لاتوجد إمراه على سطح الارض قبيحه ..! حتى لو هي فيها شبه من صورتي .. كل ماعليك سيدتي تطبيق هذه النصايح ومني ابصم لك إنك راح تكونين أطلق من لميس والثانيه ذي ويش اسمها ميرنا .
إذن إليكن بعض النصايح الفريده من نوعها <– الفضاوه لعبت بحسبتنا
(1)
وإنت في البيت توك قايمه من النوم :
محد يقدر يتوقع وش بيكون وضعه إذا قام من النوم من حيث ( الكشة السعبوله تنفخ العيون ولاتهون الأخلاق ) .. لا تخافي حواء بل بادري وبسرعه ( اي اطمري ) إلى اقرب مراية وهبطي كشتك .. و لبديها ورتبيها حفاظا على سلامة اللي حولك عزيزتي
(2)
المكياج وما أدراك مالمكياج ..!!
عزيزتي حواء تعلمين جيدا انه لو تحبين السماء و تلطخين وجهك من هالالوان منتي قالبة باسكال مشعلاني فجأه. سيدتي هذه أنتي فلا تراكمين طبقات الميك اب على وجهك لتخفين ملامحك بل اكتفي بلمسات بسيطة ناعمة واتركي عنك دمج الظلال ومطهن لين الاذن الله يصلحك
(3)
رطبي جسمك
عشان مايصير جلدك كانه جلد عكرة الضب .. مو تدهنين بزيت عافيه واللي يرحم والديكي ! دهني جسمك بكريم مرطب وعليك بمرطب جرجير مرتين على الاقل في اليوم .. بعد ما تخلصين من الكريم ضعيه في مكانه ولا تقربين لامه إلا وقت التدهن فقط .
تحذير .. لا تاكلين الكريم حتى لو صارت ثلاجتكم فااااضيه مومثل ماكانت تسوي الخبله .. أشوى إن الدكتور سرداح المنفلوطي حل مشكلتها
(4)
براطمك ماتنشاف ..! معاي بتنشاف .. وزود عليها بتاخذين نشاف
بعض الحريم يحبون يخترعون باللي هو كل هذا عشان تصير أطلق وحده ..بدون ما ياخذون في الإعتبار النتائج المترتبة على أفعالهن المتنيله بستين نيله ..! بعضهن ماعندهن تكاليف العمليه عشان تصير براطمها xxl فتتهور وتمد بوزها من غاز المطبخ لبرطمها وتنفخ لين معاد تفرقين هو وجهها من قدام وإلا من ورى .
كل ماعليك تجيبين قلم خطاط وتحددين حول الشفه بمقدار نص سم .. بعدها جيبي الروج الأحمر أوالوردي أو أي لون المهم لا يصير بني محروقي وإلا لون من ألوان فيفي عبده وإبدأي بالمزج وبعدها راح تصبح عندك براطم كبار طبيبعه بدون أي غاز اصطناعي وبدون أي تكاليف .
(5)
محد ركبته أحسن من أحد
عزيزتي حواء الخليجيه <- لاحظوا قلت خليجيه مالك إلا تستخدمين زيت الزيتون والليمون .. افيدلك
(6)
آآآآآآآآتشوووووووووو .. قصري حسك جعل حسك للقص ..!
كثير من الحريم يشتكون من أزواجهم .. تقول إحداهم .. انا لاجيت أعطس .. زوجي مو يقول يرحمك الله وكلام حلو .. ماتسمع إلا وجع قصري حسك جعل حسك للقص ..!
عزيزتي المطيوره .. لاجيتي تعطسين قصري صوتك قد ماتقدرين ولاتستلمين علبة المنديل وهاتك يامناشق تحوم الكبد
كوني راقيه وهاديه وناشقي بعيدا عن زوجك وأي شخص كان .. وصدقيني بعدها ماراح تسمعين كلمة وجع واخواتها بل راح تسمعين .. لبى هالعطسه !
(7)
إن الله جميل يحب الجمال وإحنا نقول لك ياسيدتي كوني جميله ومرتبه في البيت وليس فقط في عرس بنت خالتكم ! نعم لاتقعدين بدراعه ومسويه تطقمين مع جدتك وتحتكين عشان شسمه <- ماودك تنصح أبد
فيه بجامات حلوه بلاسينزا و نعومي و بومن سيكرت ولافي ان روز وايتام وو…الخ
اذا مستخسرتها على البيت فيه بطابا والهرم تجي طقم وبسعر حلو .. أعيد وأكرر طقم ..!
(
معذورة لو تكبرت .. مغرورة يابخت الغرور
انتبهي موب تصدقين ذا الحكي .. ياما نشوف بنات بمجالس فاهمين البرستيج غلط ..! ولاجت تسولف ودك تقولين لها يازينك ساكته !
جمالك وكشختك لن تكتمل من غير وجود روحك المرحه و الجميله ..!
وهذا مايجعلك جذابه في نظر الجميع حتى بنظر شغالتكم .
9)
طويله ويالله تدخل مع الباب .. قصيره ويالله تطول مغسلة المطبخ
مشاكلهم حلها معاي .. بالنسبه للطويله حاولي تقاطعين التنانير الطويله لأنها تبين طولك زياده ولايعني هذا إنك تروحين تشترين تنانير فوق الركبه
وتخرعين العالم بركبتك السوداء
وكذالك التنانير المقلمه بالطول لا ترتدينها وإلا بتصيرين مصاص عصير متحرك
أما بالنسبه للقصيره فإذاإنت ودك تصيرين برميل عليك بالمخطط اللي يجي بالعرض
(10)
صبوا هالقهوة وزيودها هيل
عزيزتي حواء الصغيره ( بحكم ان اصغر القوم خادمهم ) عندما يقع على عاتقك صب القهوه وتصكك الغلقه
لا تتذمري ولا تبدي ملامح الاستياء على وجهك لانك بتصيرين اقبح ولكن خذي الموضوع كنوع من التحدي
والقطي الدلة بيد اليسار والفناجيل باليمين وحافظي على رزتك وابقي ظهرك مستقيم واشفطي كرشتك وتنقلي كالجراده بالمجلس <- لاعمرك تشبهين ههههههه
(11)
اهتمي بنبرة صوتك خليك كيوت ياكتكوت
لاتزاعقين من الحماس بالسواليف وتتسببين بجريمة " فقع طبله " ..! تكلمي بصوت واطي وهادي ..
انتبهي عاد لاتخيلنه واطي مره ثم يجيبون سماعات استريو يشبكونها فيك
(12)
معاي انتي الرابحة .. ام بي سي على شحم
أدري إنك أكل ومرعى وقلة صنعة وقمة سعادتك تكمن قدام التلفزيون ومعك صينية قهوه تمخمخين عليها وحلى لو هو حواق بس أهم شي فيه نستلة ..
وعلى هذا الحال لين تصيرين كانك انتصار الشراح وهي متحجبه .. عندي الحل .. البسي بدلة الرياضة (بجامه تمشي الحال ) وخذي لك 15 دورة حول البيت ..
وإن كانك من النوع اللي يزهق من المشي عادي خوذي لك آي بود واسمعي طقاقات راح تحسين إنك مشيتي 30 دوره حول بيتكم ..
بجد ياجماعه ترى المشي مفيد يخض الدوره الدمويه ويخلي كل شي كويس <– طيب لايكثر
(13)
منيره قصت الشعر وصارت تتنح نح .. !
انا مايفقع مرارتي الا شي واحد اذا جتك الوحده على بالها انها اقوى وحده وحالقة شعرها ع الصفر ومحددة سوالفها
و حاجبها تقول قارطه فار وحاطة حزام ناسف على الخصر و مفاتيح بيتهم كل ابوها بميدالية تقرقش كانها مفاتيح الكامري اللي عند الباب
والله يابعض الحريم لاشفتيهم ودك تتغطين عنهن ! ماناقصها إلا شنب وتصير رجال !!
انا ادري ان الطب النفسي مو نافع فيك لكن مالك الا تشوفين سندريلا
(14)
لا يوقف لا يوقف
الحين انتي صرتي رهيبه وأطلق وحده ليه تخربينها بالعرس لييييه يعني بعض الحريم
لاجو يرقصون ما ودك ماترقصين معهم بالمنصه خاصة لاجت اغنية التاكسي
انواع الدفاشه والمرافس وتخريب الجو حاولي ترقصين بشكل منطقي مثل الحيه ومع الدقه ايه مثل الحيه>> وش فيكم تناظروني مهوب مثل ذيك اللعبه اللي تفرينها وتفرينها و تنطلق..؟؟
عاد انتم افهمومها
لاتبتلين كل ماقلت الطقاقه عاشو ايوة ع قلبي
الا واصله المنصه وماخذه دورها حاولي انك على الاقل اغنيه ترقصين واغنيه لا
مللللللطوووش بالحرف الواحد لا زودت ولا نقصت 
تقبلي مرووووري
عبورة الأمورة
مشكوره ياقمرر
تقبلي مروري
تسلمي ع النقل
عوافي بانتظار جديدك يسلمو ياعيسل