يوم قلت عليكي حنينه…
ولا شان شفتك ….
أنا ناديتك يا دغريه….
ولا شان سامع صوت….
خطواتك جايه….
انا غنيتك يا حريه…
إلا ظنوني عليك ما خابت…
إنو…ترجعي شمسي الغابت …
و إنو….بلاكي جروحي بتكبر…
وترجع تاني بعد ما طابت…
و الغيمات يا بنيه…الفاتت….
ترجع لينا عشان ما تمطر…
أنا …امبارح ….
شفتك …مارقة….
وكان متلفحه …توب النيل …
و ماسكه يمينك…بت ابنوسه….
وكان في يسارك ماسكه نخيل…
وقلتي…ارح..يا أولادي نقيل …
عند خالتكم …بت منيانق….
وفي بيوضه …هناك لاقتكم….
تزرع بفره…
والباباي موجود بي وفره..
وقالت ادخلو…
حبابكم..كيف اخباركم…
لينا زمن …من ما اتلاقينا…
شوقنا يدفق….
وعدم الشوفه ..دي ..حاره علينا…
كيف اخبار اولاد ناس …تيه…
وناس ادروب والحاجة رضيه…
وانشاء الله تكوني مشيتي …
لي راجا…
وبارا …وطوكر ..وكبكابيه…
وبرضو اظنك …رحتي …
لي حلفا….
نحن هنا….
بالحيل بنحمدو..
الخيرباسط …ممدود من يدو….
ورديتيلها …بي خير ياحاجه…
تب ما فيهم زولا..
اباهو عشاهو…
والا عوجة جات تغشاهو…
تب في بسطة ونعمه شديده…
والله نحمدو…
وين اولادك؟؟؟؟
شول ..و مجوك..وبتك ميري…
ما شايفاهم؟؟؟؟
مرقو.. قريب…
شول ومجوك ديل راحو يصلو …
هناك في كنيسة حي الدومه…
وميري ..دي راحت ناس التومه…
اصلو طهارة حمدي الليله…
أرقدو إتمدو..
قيلو عافيه…
انا جاياكم…
ماشه…اعوس الكسره…
عشان نتغدو…
وبين ما نايمه ..وصاحيه…
انتي سمعتي…
جوطة..فرحة…
وجاتك سرحة..
والنسمات الهبت…شالت..
صوت زغروده…وحس نقاره…
اصلو عرس بت قينق ..الليلة…
وبيت اللعبة قريب من بيتنا ….
وبت منيانق…قالت لك نمشي…
عشان ما نبارك…
ونلعب لعبة…
ولعبو اولادك…وكانو …كواتو…
وبعد انتهت اللعبه مرقتو ….
واتوادعتو…
وبت منيانق…قالت جاياكم…
والاسبوع الجاي معاكم….
وقلتي ارح يا اولادي …كفاكم…
تاني البيت بتجوهو براكم….
ارح ..يا اولادي مدينة راجا….
نمشي نزور عمتكم زينب …
ونعمل ليها….
زيارة …مفاجاءه…
ودخلت عليها …
حبابكم..اهلا…قالت زينب…
وكبت ..شاي المغرب ..
لبنو مقنن…
وكان البيت تتوسطو نخله…
وكل ما صوت طنبورهم …دندن..
هي بتتمايل…
وكل ما مالت ..
اخدت شبال…
من النسمة الجات تتقدل…
وين ناس احمد…وسارة وفاطمة…
قالت زينب …
عند الحوش البي قدام …
وراحو اولادك…
الابنوسة وأخوها نخيل…
ولعبو معاهم…
جرية وصفقة …وغنوة…
ولعبو شليل….
وانتي سرحتي…
واتذكرتي ايام المره…
الايام الفاتت راحت…
وراحت فيها رويحة السره…
قبال ده ..الليل…
كان طول…
وقلتي اريتو…
الايام ترجع زي اول…
كان قلبك للفرحه اتحول…
بس ياريت لو كان ….
الرحمة…
زي النفس الطالع ونازل….
بين الناس تصبح منقسمه…
آه…يا دنيا …
يا ما فيكي مهازل…ولخمه….
آه…دنيا…و آه…يا زحمه…
وإستغفرتي…
تف يا دنيا…
عفنه..عفينه…
واتذكرتي…مديح اجدادك…
يا رقراق الضو الفينا…
ليه الريح بتشيل مجدافها…
و بطفينا….
يا فانوس الرحمة البينا….
اتدلي وصلي…
وشيل طوريتك…
وانقح وشيل في تراب النيه…
واشتل في جوانا محبه…
وخلي نفوس الناس تتطايب…
وتبقي رضية…
والنسمات التبدا تهبهب..
وشايله اريج البسمه جوازنا …
والمفتاح الكلمة الطيبه…
تبقي دخولنا…
هيي…يا السمحه…
شايك ببرد…
قالت زينب …واستغفرتي…
كيف اخباركم.؟؟؟؟
وين حاج احمد؟؟؟
الله نحمدوا…
ردت زينب…قات حاج احمد…
راح لي فاتحة…
ناس ادروب …و أوشيك …جيرانا…
اصلو ..هو…جاهم…
هي خبير..جابتو عربيه…
خالهم همد…جاو امر الله..
اتوفي..هناك في كبكابيه…
واترحمتي…عليهو ..وزدتي..
وقلتي …عليها الروح هول الله..
هو البيعيشها…هوالبيشيلها…
وهي البتفضل بيها المولي…
وقلت لي زينب…
ما بنستغني ..ادينا الخاطر…
يبقي نصل لي طوكر باكر…
ردت…قالت الله معاكم…
هو الفي الدنيا …يبقي غتاكم…
سلمي لي علي ناس أدومه…
وزوجتو آمنه…وحبصة…
وبت مريومة…
يلا خلاص .. يا أولادي ..مشينا…
ومسكو يمينك بت ابنوسة…
وكان في يسارك انتي نخيل…
وابتسامة…
النضرت ايامنا…
ياما…
القليبا متل …
غمامة…
الصبوحة …
البتبسم…
رغم آلآمها…
وجروحها…
البتدي الدنيا …
روحها…
ازدهت بيها…
الاماني…
المعاها…
الفرح ليو …
طعم تاني…
البترسم…
فينا ذكراها…
وتفوت…
البتدخل…
فينا من …
كل البيوت…
البتسكن…
جوه اعماقنا…
وتسافر…
في عيونا…
البتهبش…
جرح جوانا..
وتهاجر…
في سكونا…
دون تخلينا ..
التذاكر…
تبدأ ترحل…
في وريدنا…
وما بتسوقنا..
هي البتتفقد…
قلوبنا…
علو شوقنا…
ما جرح جوانا…
ريدها…
هي البتتبن…
ايدنا ايدها…
العنيدة …
البترفض…
لي قلوبنا…
تكون وحيده…
التونس ….
شوقنا فينا…
التدسدس…
من عيونا …
دمعه…
حردانه وحزينه…
الحنينة…
البتدي الريح…
سكينه…
الغمامه…
النضرت ايامنا…
ياما…
اهدتني زهرة…
وابتسامه…
والفي الصحن ما بحوق….
آخر الزمن يا ناس…
ودو الصحن للبوش…
وين القرش في الجيب…
حبة عدس ما بي يجيب…
احسن تجيبو العيش…
تدوكو فتة بوش…
زمنا والله عجيب..
اصبح بتقل الجيب…
البمتلك قرشين …
يطلع يدوس الناس…
ما تبقي زول حساس,..
دي كضبة دوشة راس…
والعيشة في الدنيا…
دوس انته ما تنداس….
والله ….والله زمان…
ياريتو بس لو كان…
لو ترجع الدنيا…
زيك نلوكو لبان…
خلينا بس للبوش…
او عيشة القرقوش….
ما نحنة ناس طيبين…
ما زي ضباع وحوش…
بيناتنا حنيه…
عيشتنا بالنيه…
ابيض حليب القلب…
ما زيك النيه…
سوده وسواد يومك…
يا مكبرا راسك….
يوم الله يجمعنا…
في النار يكون يومك…
مالك ومال البوش…
والرقده نص الحوش….
الدنيا كلها وين….
ما ضل تحت برطوش…
قالو العدس ممحوق…
والفي الصحن ما بحوق….
آخر الزمن يا ناس…
ودو الصحن للبوش…
وما قدر حقيقة قليبو لي ودك…
واذا اتجاوز كمان حدك….
فاحسن يبقي بي يدك…
**********************
اذا هو بيبدأ بالنكران….
وحاول يقسي بالهجران…
وينسي معاهو كل الكان…
فاحسن يبقي بالاحسان…
*********************
تسيب الكنت تهواهو…
تفارقو تخلي دنياهو….
وتطوي الصفحة ذكراهو….
واحسن انت تنساهو….
*******************
اذا حبك فقد معناو…
واتجاهل ..مشاعرك…
انت من تطراو…
فقلبك انت ما تبراو…
خلي يتوب وينسي براو…
********************
براو الليلة بس يعرف….
عواطفو الهادره بيوقف…
وحبو الكان… وريد ينزف…
مشاكلو متاعبو بكرة تخف