هنا ..
نعد أمتعتنا ..
لنأخذ قلوبنا .. في رحلة خارجه عن نطاق المألوف ..
رحله إلى عالم الإبداع ..
نحلق سويا في فضاء الكلمات .. وعذوبة المشاعر ..
رحلتنا تتوجه إلى عالم الأحاسيس المتدفقه ..
لعالم لايسكنه سوى (( فهد المساعد)) ..
كان التفرد بهذا العالم من نصيبه .. لأنه من اكتشفه ..
ومن سقا أرضه بوابل من التميز والإبداع ..
كل شيء في عالمه مختلف .. كل شيء ..
حينما تمسك يداه مزمار الكلمات ..
تتهيج نبضات القلوب تأثرا وحزنا ,,
يعزف فتفيض العين دمعها ..
حتى صوت الناي في عزفه .. مختلف ؟؟
في عالمه .. نعيش فصولا من الأحاسيس ..
ليست فصولا كالتي نعرفها ..
استأثر الحزن بنصيب الأسد
فكان أطول فصوله ..
الحزن .. في عالمه طاغي ..
حزن نسجته الأيام بحرفنه .. وإتقان ..
جسد فهد المساعد ..
هذا الحزن بنبضات قلب موجوع .. قلب يئن ويعاني ..
قال ……. انه : ( مدينه تنتظر .. رجعة غريب ) ..
فكانت .. دعوه لقلوبنا .. بأن نزور أرضه ..
وان نستوقف رحلتنا طويلا في محطات نبضه ..
لنعيش فصول احاسسه ..
ونستوطن حارات مدينته ..
نحن معه .. نشاطره المشاعر ..
فكلنا (( مدينه .. ننتظر .. رجعة غريب )) !!!
لن أطيل ..
لنذهب إلى تلك المدينه ونستكشفها ..
.
.
أتمنى لكم سفرا ممتعا مع هذه المحطات ..
بقلم : الصحفي والكاتب الأستاذ/ صالح الخليف ..
دمع تهادى على جفني وأنا غافي
سترت دمعي بكمي قبل يغريني
وأخذت هذا الجسد من باقي لحافي
وسريت تايه ورا خطوات رجليني
لا الوجه وجهي ولا أوصافي هي أوصافي
أمشي وأقول لطريقي لا توديني
لعيون ناس تبي تدري عن الخافي
أمانتك.. خلها ما بينك وبيني
خابرك يالدرب خوة عمر وسنافي
ما ودي الناس تدري وش يبكيني
كرامة النفس ورث أبوي وأسلافي
أمشي وأحس الخناجر في شراييني
والبرد يمشي وراي وينهش اطرافي
وحيد والليل بردونه يغطيني
تقول كن البلد روح بها السافي
إلين ما أوحيت لي صوت يناديني
صوت أعرفه مثل ما أجهل وش خلافي
قمت أتلفت وانادي لا تخليني
ما غيره.. الصوت هذا صوته الدافي
ولمحت زوله من أقصى الدرب لافيني
مدري وش اقول لكن حي ها اللافي
تعال.. شف غيبتك كيف أثرت فيني
تعال.. شفني وأنا أغرق عقب مجدافي
تعال.. خذني ورحبي من عناويني
تعبت أعدي على جمرك وأنا حافي
تعال واقطف بصوتك زهرة سنيني
كل المواعيد عقبك شمعها طافي
تعال وازرع خصل شعرك بكفيني
بضمها لين أحس بليلك الظافي
تعال وشفيك خايف؟ أنت ناسيني؟
قطعت صوتي عليك وطال ميقافي
حتى بديت أشعر أن الحب معميني
وان أنت حلم عثى فيني وأنا غافي
لكن أمانة ترى اللي في كافيني
إن رحت منك كذا ما رحت متعافي
بصدق الحلم وأحذر لا تصحيني
في خاطري كلمتين إن قلتها كافي
أمانة الله عليك إن غبت عن عيني
لا يكون قلبك مثل قلب الزمن جافي
مع كل دمعة تذكر رعشة يديني
ومع كل ضحكة تذكر قلبي الوافي
.. أخترت هذي ..، وأنت شف لك سحابه
قلت .. ويديني تحتضنها مثل طوق .. :
أخترت هذي ،،. هذي أكثر رحابه
هذي دفا صوت من البرد ~ مخنوق
هذي سؤال نصف عمري جوابه
هذي هي اللي عرفتني على الشوق
هذي قدر .. ماكنت حاسب حسابه
قطعة حزن في جيب بالي ومشقوق
ومضة فرح في عيون ناس غلابه
أن سولفت .. في ثغرها لمعة بروق
وإن سرحت في عيونها صمت غابه
واليا اضحكت .. نور من الفجر مسروق
واليا بكت تحزن عليها الكآبه
حبي لها لوأدري ان فيه مخلوق
قد حب مثله .. قلت : ياللغرابه !
هالآدمي من وين له قلب وعروق؟!
والصبر هالمسكين من وين جابه؟
وأنا أتكلم .. ردت عيونها فوق
ثم تمتمت : من هي هالأكثر رحابه؟؟
قلت ويديني تحتضنها مثل طوق
في ذمتي ماشفت غيرك سحابه ..~
7
7
إن من يكره نجاحك .. يدري إنك مانجحت
أمس ضقت .. ورحت أقلب ذكرياتي .. وأنتهيت
عند صورة طفل صوته مثل صوتي لانجرحت
وش مثل لا والله إلا هذا أنا يوم ابتديت
أنطق حروف تلعثم في لساني لا أنمدحت
هذا انا يوم الحياه فنظرتي عشرين بيت
ومسجدين .. ومدرسه من طين كم فيها اصطبحت
هذا أنا وأصبحت اتمتم : هذا انا حتى بغيت..
.. أختنق .. بس القدر عيا على موتي .. وطحت
وصاح صوت الطفل فيني : أنت من وين ارتميت
قلت أنا المستقبل اللي فيه كم همت وطمحت
أمس كنت أبيك تكبر .. بس والله لو دريت
أني اللي عشت لأجله مت عندك وأسترحت
لو دريت إن الزمان يجر رجلي .. ما عديت
ولو دريت إن البحور بلا مواني .. ماسبحت
كان دربك لي طويل .. وكل ماشفتك هويت
قلت لك : كبوة جواد .. وما كبيت إلا وجمحت
ليه تسمعني وتمشي ؟! آه ليتك ما مشيت
و آه ليتك من كثر عثرات الأيام أنتصحت
ضاعت احلامي .. وظل الحزن فيني .. وأهتديت
للطريق اللي يوديني على دمعي .. ورحت
يالحزن .. ليتك مثل دمعي وتنزل لا رقيت
بس أعرفك .. لو مسحت الدمع تبقى ما انمسحت !
كان حلمي .. في وجود إنسان يبكي لا بكيت
وصار حلمي .. في وجود إنسان يفرح لا فرحت
كنت أشوف الناس مثلي كل ما جعت وضميت
مادريت إن الأوادم ناس فوق .. وناس تحت
آه ياأول ذكرياتي خذني فحضنك نسيت
لأسألك عن وجه ابوي اللي معه ياما سرحت
خذني فحضنك أبغفى .. ياه مبطي ماغفيت
وإن لمحت دموع عيني .. سو نفسك مالمحت
خذني فحضنك .. وبعثر في جروحي وإن قضيت
هز لي كتفي .. وقل لي : عيب تبكي لو سمحت
إضحك .. وعلم زماني من أنا .. ومن وين جيت
طق باب الحزن .. واصرخ في لامني فتحت
و ضمني يمك .. وكمل ضحكتك لامن بكيت
ودي أذكر كيف كانت ضحكتي لامن فرحت !
7
7
وادري انك من خلقتي في ظلال وفيه
ما لعب فيك الزمان ولا قرفتي جوعه
ولا وقفتي من همومك وقفتا محنيه
ادري ورب اليتيم الي يهل ادموعه
مابعد هلت دموعك في ضحى عيديه
بين حضن ابوك وامك وردتا مزروعه
طول عمرك مافقدتي لمست الحنيه
ايه اعرفك واعرف ان الناس لك متبوعه
وادري ان امرك مجاب وحاجتك مقضيه
بس انا من فضل ربي هامتي مرفوعه
ورث ابوي وراس مالي عزوتا جابريه
منحنيت الا لمخافت ربي المشروعه
ولا بعد دفقت دم الوجه امد ايديه
ابدويا ماعرفة الضحكه المصنوعه
احمد الله من خلقت وطيبتي فطريه
قانعا في حكمة الله ماشيا في طوعه
ماحسبت احساب دنيتا ناسها طرقيه
ايه انا يم الترف قلبي غدا موضوعه
الفراق الي بلا رجعه وطاري جيه
بس روحي وسايري قلبك وهدي روعه
واعذريني ولا عادي ازعلي عليه
دامها وصلت لذل النفس يا الدلوعه
والله ان يعيش راسي ما انحنا لبنيه
7
7
ايه سمي يا بعد كل الولايف سمي
والله انه تاج راسي دعوتك يالطايف
أبرك الساعات ساعة مالتفتي يمي
ابشري وبجاه رب جبالك النوايف
ان أسوق لك القصايد لومهرها دمي
يكفي ان رجالك اللي يمنون الخايف
مزبن اللي مزن همه سيلها متحني
والله العظيم لولا (ربطة )الوظايف
ان أقضي كل عمري فيك وانسى همي
وآخر الأبيات شكرا يا ربوع الطايف
يوم لدت لي عيونك والتفتي يمي
هو عشان السهر وإلا عشان المنام ..؟
شف عيوني وشف وشلون جسمي نحيل
لعنبو هالغرام إن كان هذا الغرام ..!
آه ياقلبي اللي مابقى فيك حيل
من كثر ماطواك الشوق ولد الحرام
قلت لك لاتميل إن طعتني لاتميل
بس هذا أنت ملت وماسمعت الكلام
يوم ذيك الصبية أم ذاك الجديل
جت تهادى وتمشي مثل مشي الحمام
إنكسرت وقعدت تحط في وتشيل
لين رحت وخذتني في طريق الهيام
قبل أسلم عليها كنت عابر سبيل
وصرت ديرة غرام وعشق بعد السلام
كنت اقول : أي حب وأي خل وخليل
الهوى ماوراه إلا التعب والملام
لكن اليوم شفني ضعت وأكبر دليل
اني امشي واهذري( إبتسام .. إبتسام )
مع كل نسمة صباح أقوم وأيديه
ترفع بعضها كذا .. وأقول وأنادي
الله يسعد صباحك يالسعوديه
عساه والله صباح الخير يابلادي
***
يادروب الأرض لعناق السماء
ياجداول ماء لحكاية ظمأ
يالكلام اللي عجزنا نبتديه
من يقول أنك كما غيث هما
أنتي لاقبلك ولابعدك كما ..
علمينا كيف نلقى لك شبيه
يابلدنا وين نلقى لك شبيه
في وميض البرق لاسال الغمام ؟!
في شعاع الشمس لاشق الظلام ؟!
في أبتسامة شايب صلى ونام !
في المحبه .. في السماحه .. والا في معنى السلام !
يابلدنا صعب نلقى لك شبيه
وأنتي اللي لاذكرنا أنك بلدنا
نرتبك حب وغلا
ونتلعثم في الكلام
***
عمار يادار السعد
لا يالسعوديه عمار
والله ماقبلك بلد
والله مابعدك ديار
مادام أبو متعب سند
الحر أبن نسل الحرار
ايوالله نحبه عدد
مايطوي الليل النهار
والكل منا لاسجد
يقولها سر وجهار
أمجاد ياوجه السعد
وعمار يابلادي عمار
***
ياوطنا ..
ياطموح اللي تمنى
نحمد الله يوم صرنا فيك ..
والا قبلك كيف كنا
ياوطنا ..
يالنخيل اللي تثنى
لو بكيف الشمس ماخلت يديك ..
ولاخذاها الليل عنا
ياوطنا ..
أنت حنا..
الرجال اللي بطهر أرضك تغنى
والبنات اللي ينسماتك تحنى
ومن تنكر لك ترى ماهوب منا
***
وطنا كثرة أحبابك تحير والكلام يطول
ولكن لاتغرك ياوطنا كثرة أحبابك
بعض هالعالم يحبك عشان النفط والبترول
وحنا ننطح العالم على ذره من ترابك
لك الله ياوطنا .. لابدا اللازم .. وطق الجول
نجي وثيابنا لعيونك أكفان تغنابك
نجي ماهمنا الماضي ولاخفنا من المجهول
نجي ونقدم الموت بيدينا قبل نحيابك
كما عودنا فهد لا يحضر الا بالجمال..
والصمت في حضرة الجمال أبلغ
أترككم مع الجمال..
المجله : فواصل
العدد : 283
التاريخ : 1 نوفمبر 2024 م
المناسبه : نص (تغريبه)
,
,
ضحكتي غابت وهدتني .. وبانت شيبتي
والطفولة ودعتني وأبتديت أفقدها
مابقى لي رغبة الا رغبتي في غيبتي
بشروا عني قلوب غيبتي تسعدها
هاجسي,طيشي,شبابي,حلم عمري,ريبتي
كنتي أكثر شي يبهج روحي ويسندها
وين أشوفك بعد ماحلت علي تغريبتي
وأجبرتني أترك ايدينك .. ومدت يدها
عاد أنا سمي , وداي , وعلتي , ومصيبتي ..
لاكبرت بدون مدري بالزمن .. والأدهى ..
لادريت إني كبرت .. وصارت أكثر هيبتي
وصرت طفل شوفة الأطفال لي .. تبعدها
ماأحس إني صغير الا إذا (حبيبتي) ..
أرفعت لله يديها .. جعلني ماأفقدها
أمي اللي لو تحس شوي طالت غيبتي ..
تنتظرني .. لين أجيها ثم أقبل يدها
جنتي أنها تشوف أني طفل .. ومصيبتي ..
حزني اللي في عيوني لابغيت أسعدها
فهد المساعد
صاحب جميل .. وقلبك أجمل .. والأجمل ..
ضحكتك يابو ضحكة تشبه العيد
ماأقول كامل .. بس قربت تكمل
ماناقصك غير أحترام المواعيد
* * *
دورت بعدك حبيب .. وقلت في بالي ..
أحب همي ؟ .. وقال القلب : رو قنا
قلت أنت وش دخلك .. ب أحب غربالي
أقل حاجه .. نموت وماتفارقنا
* * *
ماعرفت أرضيك ياعذب اللما
يوم تمدحني .. ويوم تسبني
أنت ي أما حبني حب عمى
والا ريحني .. بلاش تحبني
* * *
الدمع ماهو عيب .. رح علم اللي
يقول عمره مابكى في حياته
الدمع مايقطع صلاة المصلي
والضحك مثل أبليس .. يقطع صلاته
* * *
تدرين لامنك زعلتي وش يصير ؟
تدرين لامن صار خاطرك مكسور ..
تكدس أغصان الشجر بالعصافير
وكل ماذرفتي دمعه .. يموت عصفور
* * *
19 عام .. وبقى لك بعد عام
ويصير عمرك مثل ماأنتي تحبين
عقبال ماتمضي الليالي والأيام
ويمر يوم فيه اشوفك تقولين : ..
ياشاعري قل للدفاتر والأحلام
مرت سنه واليوم كملت عشرين
قلي كبرتي .. قل كبرتي .. من العام ..
وأنا احتريها .. وأنت ساكت لهالحين ؟!
وأقول هذي كلها حسبة أرقام
هو للسحابه عمر !
ردي ؟!
وبعدين ..
مهما تكبرك الليالي والأيام
تبقين طفلة قلبي اللي تحبين 
* * *
يافديت اللي اذا جيته أقول :
قل أحبك .. أستحى ماقالها
وأن زعلت .. يتمتم بهمس خجول :
تطلع أحسن لو تجي من حالها
* * *
فهدالمساعد..