جميعنا .. لا يخفانا من هو متعب التركي المطيري
فهو من قال :
اكتب ب غيره والقصايد تجي فيه
كن القصايد حالفه ماتخونه ؟
و قال :
اصعب فراق افراق عكف الاشانيب
ماهو مفارق لابسات الغدافي
و قال :
الموت هين والبلا وش ورى الموت
عند الحساب ايهون .. سهم المنايا
( متعب التركي )
شاعر استطاع بجداره طرق قلوب الناس وتوصيل همس الحروف الى كل متذوقي الشعر .
متعب ابدع في سلاسة الاسلوب وضوح المغزى وانتقاء الكلمات .
شاعر تناقلت وسائل الاعلام قصائده فحفظ الناس ابياته عن ظهر قلب .
لانها صادقه – مؤلمه – نقيه – واضحه – مترجمه لمعاناتهم – باختصار شديد لانها نابعة من القلب .
وانا واثق تماما . إن الكل منا .. نجد في هاتفه رسائل وقصائد .. لمتعب التركي وهو لا يدرك .. ولا يعلم بأنها لمتعب .
وفي الاونه الاخيره ابتعد متعب عن الساحه الشعريه بكل مافيها الى طريقا نتمنى له فيه الثبات والاستمرار .
متعب التركي شاعر لم يلاحق فلاشات الصحافه في مسيرته الشعريه ولم يكتب قصائده لهدف النشر بل لترجمة الاحاسيس والمشاعر .
متعب معلم التربيه الاسلاميه الان في حفر الباطن .
ولا يسعني هنا بصفتي احد متابعي هذا الشاعر واحد جمهوره ، الا ان اقول الله يسعدك في دنياك واخرتك ، فقد ابدعت يامتعب بكل ماتحمله الكلمه في قصائدك والتي وصلتنا مدويه – ملتهبه – نازفه – جميله ورائعه
وايضا اعزائي اعضاء مدونة عبير.. ورواد قسم الشعر
جمعت لكم باقات ورد من بساتين هذا المبدع
ولملمت لكم بعض نزفه من مستنقع الجراح
لتعرفوا الكثير عن هذا الشاعر الرائع
روائع الشاعر الكبير (( متعب التركي المطيري ))
قالوا حبيبك يسمع الشعر قلت أيه
يقراه بعيوني قبل تسمعونه
لولاه حتى طاري الشعر ما ابيه
مير أكتبه من شان خاطر عيونه
هو روح شعري وأمنياته وماضيه
جذع الشجر وش كان لولا غصونه
اكتب لغيره والقصايد تجي فيه
كن القصايد حالفه ما تخونه
هذاك لا منه زعل قمت أهاديه
حتى وهو مخطي تعذرت دونه
يمكن لو أنه يلمس الجرح بيديه
يستغرب ان اللي لمسها طعونه
ابطى وهو غايب وزلت حراويه
وأنا من العام آتحرى مزونه
هو مادرى اني في غيابه محاتيه
ليته نشد عن حالي اللي يجونه
واقلبي اللي توه أفلت عراويه
كيف انسرق وضلوع قلبي حصونه
عجزت أرده كان ماني براعيه
يوم انتثر شوقه وهاضت شجونه
يبسن عروقي لكن اللي يعزيه
ان اكثر العالم تردد لحونه
خافو من الله لا تجيبون طاريه
لا صرت أنا موجود لا تذكرونه
لو كل غالي جابه الله لغاليه
ما شفت لك مخلوق تبكي عيونه
متعب التركي
يوم طاب السهر عيت تطيب النفوس
جت من الله وانا كم كنت محتاجها
كنها من حلاها كل ليله عروس
خايفه من عيون الناس واحراجها
حي هالطول يا زول عساه محروس
من عبث لوعة الايام وازعاجها
تزعل نفوس ولا تمتلي غيض روس
من يقرب لها وضلوعي سياجها
لي متى وانت يا شوق القلوب محبوس
طالت السالفه وابطيت بعلاجها
جعل قلبن على نار الغياب محموس
يحترق بين صاليها وهاجها
من خبر له غلا بين الضلوع مغروس
غرسة كل ابو شعري من انتاجها
لا تقرب لك الفرقا هذيك الهجوس
من متى والبحور تفارق امواجها
لازم اصبر على وجه الزمان العبوس ..
لين سود الليالي يضحك احجاجها
من بغى يقطع الفرجه يعاف الجلوس
لين ياصل نهايتها ومخراجها
كان شعري قصر ما طال شمس الشموس
تستريح القصايد داخل ادراجها
متعب التركي
توديع الأحباب مثل الموت له سكره
ادمى جروحي وشق الصدر منيا
والقلب طير ضلوع الآدمي وكره
لأشاقه الطلع لاسلم ولاحيا
مصير الأحزان تنساني وتفتكره
ماكل الأيام بيض وسمحة محيا
قل غيرها ماأنت لامجبر ولامكره
لاصار ماهي غلا ماأبي لك حميا
لو في يدي شي ماقلت الوعد بكره
حزمت حدب الضلوع وقلت لك هيا
لو كل غالي يجي دايم على ذكره
ماصرت اشوفك هناك وحبك هنيا
ياليتني لابغيت اكره قدرت اكره
ماكان قلبي ليا جيت اكرهك عيا
مادامك معيف رح لكن على فكره
ماقلت لي ليه دمعك سال منيا
متعب التركي
( الموت هين )
الموت هين البلا وش ورا الموت
عند الحساب يهون سهم المنايا
باكر نموت وتصبح قبورنا بيوت
وعقب القصور بضيقات الزوايا
في جوف الارض وكل من حولك سكوت
وتعاقبن بالقبر عوج الحنايا
يارب يامنجي نبيك من الموت
سترك وعفوك يوم كشف الخفايا
باكر اليا جينا على داعي الصوت
شيبان واطفال وشباب وصبايا
ندعي وحنا بين باكي ومبهوت
ورحنا لها ننقاد مثل السبايا
يارب تهديني قبل لحظة الفوت
وتغفر ذنوبي ياكريم العطايا
اشكيك هم داخل الصدر مكبوت
وأيامي الي بالخطايا ملايا
أن لاذ بك من كان طايع ومبخوت
في من يلوذ المرتكب للخطايا
يارب ياقادر على كل طاغوت
لا ياقف اللي وحدوبك خزايا
رحماك لامنا صحينا من الموت
واليا وقفنا عند بابك عرايا
متع التركي
اسكت وخل الكلام ل جرحي الدامي
لو غيرك إلي يسولف ما تحملته
لكن علشان عينك هانت ألامي
للحب مفهوم عمرك ما تخيلته
ما أظن يستوعبه تفكيرك السامي
هذا الفراق الطويل وهذي أسئلته
هذا حصاد السنين و هذي أيامي
ياما وياما عليك البال طولته
والعمر عدى وأنا عايش على أوهامي
حتى طريق الفراق إللي تساهلته
لقيته أصعب على نفسي من أقدامي
اصبر شوي لو دمي تثاقلته
بحاول أستوعب اللي صار قدامي
الحب ضحكه بعينك بس ما طلته
عمرك بهالكون شفته أبسط من أحلامي!
القلب لو ما خفق لك كان ما شلته
ولو ما أنت ملهم قصيدي جفت أقلامي
العام طاري غيابك ما تقبلته
واليوم حرماني أصبح مصدر إلهامي
لا تعتذر لي وبنسى كل ما قلته
وش ينفع العذر لامن ضاعت أيامي
متعب التركي
يوم اجنبوا عني من الضيقة اشملت
جيت أتكلم بس عيا لساني
ماكني إلا مرتكب ذنب واخملت
الله يسامح من ذكرت ونسانيي
وأنا أدري إني لاذكرته تجملت
عانيت وأدري كل طيب يعاني
وعلى حساب طعوني الخضر جاملت
ياماخذوا مني ولا احدأ عطاني
من طيبتي في حق نفسي تساهلت
عزاي لامنه تجهم زماني
يممت وجهي للكريم وتوسلت
واللي يبي قربي وبعدي لقاني
أمشي على وضح النقاء ما تختلت
يامن سكنت اجمل زوايا كياني
ياما على نفسي عشانك تحاملت
مرات احس انك معي شخص ثاني
ومرات احس انك حبيبي وما زلت
لاتفرح انك دجت بين المحاني
لو ماتخون الذاكره ما تسللت
عشان ماضيك الجميل وعشاني
حاول تشيل من الوفا ربع ماشلت !!
ماني على خبرك حبيبي تراني
حتى عن اصغار الاماني تنازلت !!
متعب التركي
( الموت هين ) الله يثبته على الإيمان والطاعه
إختيار راقي زي ما عودتنا طير القوافي
كل وحده أحلا من الثانيه
سلمت ودمت
( الموت هين ) الله يثبته على الإيمان والطاعه
إختيار راقي زي ما عودتنا طير القوافي
كل وحده أحلا من الثانيه
سلمت ودمت
امين
تسلمين
كل الشكر لكي
الله يسلمكي
سر ياقلم واطفح على كايد الموق ….. ربانك اليمنى ومركبك الاوراق
وإن سربة عينك ترى خمسي سبوق ….. ماجاك مني حق والرد مالاق
من دم غرقان نسف خلفه حقوق ….. نجدد لك الميثاق من جم الاعماق
وسر ياقلم لعيون دره بصندوق ….. ومانيب غطاس ولانيب بواق
سحابة مرة على الراس من فوق ….. واقفت وانا المقفي ورى ضوح براق
صبر صبرته لايقولون مطفوق ….. وطويق لوينطق محا صبره فراق
وانا دخيل اللي فتني بمخلوق ….. عن جاه خلق الله في جاه خلاق
ياحيلة الله بان ماكان مفهوق ….. وقت امانه صار خاين وسراق
إن قلت هانت وافق الطاق مطبوق ….. واصبحت انا ملحوق من عقب لحاق
سر ياقلم واكتب من الغبن طاروق ….. انا اشهد ان البعد والصد حراق
ياويل حالي يوم راودني الشوق ….. وانا بعيد الدار والقلب عشاق
مشتاق للي عشقها عاقني عوق ….. يامن خبر قلب على العوق مشتاق
لليلي طويل ودامع الوجد مدفوق ….. ياشيب عيني من تناهيد الاشواق
ممسي على حلم من الياس منسوق ….. والصبح شرب الهم والريق ماراق
إن كان لي شمس ترى ماله شروق ….. وترى الزمن باقيه ماعاد ينطاق
يابنت انا مخلوق لي دم وعروق ….. ولي قلب من عشقك لهالحين مافاق
خليتني للحزن والحبر والموق ….. والليل والغربال مع بيض الاوراق
شعر / متعب عبدالله التركي المطيري