•.♥.•° ღ♥ღ رواية من حب عفوي الى حب جنوني •.♥.•° ღ♥ღ
بعد ان لاقت روايتي الاولى "أنوثة خياليه بالرغم من الملابس الرجاليه" إعجاب الاغلبيه ولله الحمد .. غامرت بكتابة رواية أخرى .. أتمنى أن تحوز على رضاكم …تابعوني واستمتعوا … ولا تستعجلوا أحداثها ..
هذه الروايه انا كتبها " عقد اللؤلؤ " او "عقد اللؤلؤ المكنون 1" .. اللي يبغى ينقلها ينقلها ولكن بحفظ الحقوق وذكر اسمي عليها ….
روايتنا تحكي عن أصحاب شقتين منفصلتين في الدور الثاني من عمارة سكنيه .. وهما جيران من أكثر من 20 سنه … عن حرمتين ( مزنه . منيرة) توفوا أزواجهم وتركوا لهم أطفال .. جمعوا حزنهم على بعض وصاروا مثل الأخوات.. وتعاونوا الثنتين بتربية أطفالهم ..اللي عاشوا مع بعض كأنهم أخوان بالرغم من فارق العمر بينهم .. كبروا وكبرت معاهم مسؤوليتهم ومشاكلهم … وتغلبهم برغم المصاعب على ظروفهم القاسية فهم فعلا أبطال… ويحق لهم يكونوا أبطال .. وأيضا أبطال روايتي هذه ..
عائلة أبو بتال .. بتال 19 سنه … سميرة 32 سنه .. أم بتال مزنه أرمله …
عائلة أبو روضه … روضة 24 سنه.. أم روضه منيرة ..أرمله ..
>>>>>>>>>>>>>>>>>>>>>>>>>>>>>>>>>>>>
الجزء الاول
>>>>>>>>>>>>>>>>>>>>>>>>>>>>>>>>>>>>
(بتال .. شاب حليو … نحيف وطويل .. يعتبر ابيض .. ملامحه هاديه .. عيونه سوداء .. من ناحيه دقنه وشنبه فهو كل شهر بلوك جديد … حنوون جدا .. أمه من خوفها عليه أخرته سنه عن الدراسة .. طالب مجتهد .. )
في شقة أم بتال ..
سميرة "وهي تجلس بالقهوة": .. تفضلي روضه ..
روضه :.. بلا رسميات يا سميرة .. تعالي اجلسي وبس ودي أتكلم مع احد …
سميرة "بقلق": خير روضه ايش فيه …
روضه "بحماس":.. سمعتي عن رجيم اللبن والتمر …ودي أسويه يقولون ينحف أكثر من 6 كيلو بالأسبوع ..
سميرة "بلا اهتمام": وبعدين ..!!!
روضه : سميرة .. تراني متحمسة للرجيم فلا تحطميني …
سميرة "بملل .. ورجعت تتكي بظهرها":.. وايش المطلوب مني …
روضه "بحماس": ..اسألي زميلاتك في البنك… و ابحثي في النت..هل فعلا اللي يقولون عنه صحيح …
"روضه تعاني من سمنه وزنها فوق الـ 118 كيلو … زادت حالتها لما توفى أبوها وهي بعمر9 سنوات .. صارت تاكل ليل ونهار .. وهالشي سبب لها لخبطة في الهرمونات .. اللي زودت الشعر في جسمها وخاصة وجهها … واصيبت بالسكر .. قصيرة وهالشي خلاها توضح انها سمينه مره … شعرها اسود ناعم وكثير.. بس مافيه لا قصه ولا غره ولا شي طوله واحد من جبهتها لحد نص ظهرها .. ملابسها دائما جلابيات او قميص بيت .. لما تكون رايقه مافيه احلى منها ومن خفة دمها .. ولما تعصب ما تعرف احد "
سميرة : يا روضه ريحي راسك من الرجيم جسمك كذا خلاص ارضي فيه كم رجيم سويتي ولا نحفتي بس تتعبين على الفاضي ..
روضه "بزعل": لان محد يشجعني …
دق جرس الباب بشكل سريع …
ام بتال "بصوت رافع": .. افتحوا الباب هذا أكيد بتال .."وبفرح".. انا اعرفه اذا نجح ما يفتح بالمفتااح …
سميرة تفتح الباب بسرعه … ويدخل بتال
بتال "بصوت راافع":نجحححت باركوووا لي … 98
سميرة "بفرح واضح":مبرووووك ياخوي مبروووك …"وسلمت عليه .. وعيونها تدمع"
ام بتال "تمد يدها الثنتين له": … الله يفرح قلبك مثل ما فرحتني … مبروووك يا وليدي … مبرووووك …
بتال "يبعد عن سميرة ويروح لحضن امه": .. الله يبارك فيك يالغاليه … كل هذا بفضل دعاك ورضاك علي ….
ام بتال : والله وكبرت يا بتال …
بتال : الله لا يحرمنا منك .."ويبوس يدها"..
لف بتال على روضه ..اللي رجعت الطرحه على راسها بإهمال …
روضه "بدون تعابير على وجهها" : مبروك يا بتال ..
بتال "قرب منها وسلم عليها": الله يبارك فيك … بس ليه بدون نفس ..
سميرة "ضحكت": كالعاده رجيم جديد …
بتال "جلس جنبها … وهو يضحك": ومين هالمره اللي قال لك عن الرجيم …
روضه " بزعل ": ايه اتريق انت واختك …"وقفت"يالله بروح مع السلامة …
ام بتال "تطالع في سميرة وبتال بزعل": روضه لا تزعلين منهم بس يمزحون معاك ..
روضه "تتصنع الابتسامة": لا خالتي مافيه زعل بس امي موصيتني ما اتاخر عليها .."رمت الطرحه على وجهها " باي ..
بتال "وقف معاها":وانا جاي معاك عشان ابشر خالتي منيرة إني نجحت …
سبقته روضه وفتحت باب الشقه ورايحه لشقتهم اللي مقابله لشقة ام بتال ….
سميرة "تمسك بتال قبل لا يلحق روضه": كم مرة قلت لك لاعاد تسلم على روضة في وجهها .. ما يجوز ماهي أختك .."ضربته على راسه".. هييي ولد خلك مؤدب عندهم ولا تتاخر ..فاهم
بتال "بعصبيه": طيب طيب ما راح اتاخر …اوووف
روضه لسى واقفه عند باب شقتهم … لما سمعت صوت بتال طاح منها المفتاح ونزلت بصعوبة تأخذه …
بتال "سحب المفتاح من يدها":ساعه على بال ما تفتحي الباب …
روضه "بتعب": ا ا ارتاح شوي …
بتال "وهو يدخل الشقه قبلها": ليه جايه من فرنسا .."وضحك .. وبصوت عالي "..خاالتي منيرة …خالتي ..
دخلت روضه وراه و طلعت ام روضه من المطبخ …
ام روضه : هلا هلا ولدي بتال …هاه بشر يمه نجحت …
بتال "بابتسامه عريضة": اكيد يا خاله …"وقرب منها يسلم عليها"
ام روضه : مبروك مبروك يا بتال .الله يوفقك يارب …"ومسكته من يده ودخلته الصاله … ولفت على روضه اللي كانت متكيه على باب المطبخ " … روضه جيبي الغداء عشان يتغداء معانا بتال …
بتال " يجلس وهويطالع الساعه": .. يا خاله الساعه 12 .. تتغدون الحين …؟!
ام روضه "وهي تجلس جنبه": ايه يا ولدي مين ننتظر … مافيه احد يروح دوام ولا شي .. "وبحزن"وابو روضه الله يرحمه من لما مات تغيرت أمورنا …
روضه .. وعلامات الحزن بدت على وجهها …
بتال "حس انه السبب في حزنهم لما ذكرهم بابو روضه … وحب يخفف الجو شوي":.. الله يرحمه يا خاله …"وبضحكه"..بس انا سالت لان معقوول روضه بتنتظر لحد الساعه 9 وقت العشاء ..
اتوقع بيجيها انهيار عصبي …"وضحك"..
روضه "رفعت وحده من حواجبها … وفكت يدها اللي كانت متكتفه او اقصد شبه متكتفه لان سمنتها تمنعها ..وهي ماده بوزها شبرين": مااالت عليك يا قلم الرصاص .."وكشت عليه بيدها .. ودخلت المطبخ تخرج الغداء"..
ام روضه "بابتسامه": ..الله يهديها ما تصبر عن الاكل … واذا جاعت تشين حتى اخلاقها ..
بتال : اسف والله يا خالتي ترى بس احب امزح معاها ..تعرفي اني روضه مثل اختي سميرة …
ام روضه : ايه ادري يا بتال ..انت لما انولدت عمر روضه تقريبا كان ست او خمس سنوات … وكانت تتمنى يجي لها اخ لما كانت تشوف سميرة تقول اخوي الصغير.. بس بعدين اقتنعت ان مالها اخوان .. "وضحكت"وقسمناك بينهم وصرت يوم اخو سميرة ويوم اخو روضه ..
بتال : وانا اقول وش فيني يوم أحب سميرة ويوم أحب روضه ..هههههههه
روضه دخلت بالغداء وهي متاففه وماده بوزها …. حطته على الطاوله وجلست على طووول أخذت الملعقة … وبدأت تاكل ..
بتال "يطالع فيها ":بسم الله علينا …طيب اعزمينا يا ست روضه ….
روضه "وهي تاكل بخراشه": اللي يبي يجي .. ما تشوفون ما عندكم عين …."ورجعت تاكل "
ام روضه "متعوده على بنتها … لفت على بتال": قوم يمه تغداء معانا ….
بتال : اخاف روضه تاكلني …
روضه "طالعته بنظرات قويه .. وفمها مليان اكل"…
بتال "يمثل الخوف": شكلي بطلع بكرامتي احسن لي …."و وقف"
ام روضه "وقفت معاه": بلا هبال تعال اجلس معانا وكل لقمتين وروح …
بتال … وهو ماشي مر على الطاولة ..وشم ريحة الاكل …اخذ نفس …
بتال : الله ..رووووعه ريحة الاكل ….
ام روضه "تطالع في بنتها": قومي جيبي صحن واعطي بتال شوي ياكله في بيتهم ….
روضه "وهي ما تطالع في امها": .. مافيه … خلص … كله حطيته هنا …
بتال "وهو عارف روضه وتفكيرها": .. ما عليك يا خاله ..انا بروح اخذ لي من المطبخ …"وراح للمطبخ "…
روضه رفعت راسها تشوفه وهو رايح للمطبخ … وامها بتساؤل راحت ورى بتال … وقامت بسرعه روضه تلحقهم للمطيخ …
وشهقت لما شافت بتال …وهو ماسك صحن فيه رز ودجاج …
بتال "ماسك الصحن .. ويلف على روضه وهو يحرك حواجبه بسرعه ..": مشكورة اختي روضه … باخذ الصحن وبرجعه لكم بكره …
ام روضه .. تطالع في بنتها بنظرات ..وكانها تقول لها فشلتينا …
روضه "تطالعهم بحرج":… لا بتال ..هذا لي ..ترى والله ما اصبر للعشاء … بنقنق عليه بعد ساعتين …
بتال "فتح عيونه … وهو رافع اصبعه الاثنين": ساعتين ..!!!
روضه "تبلع ريقها":اقصد بعد ثلاث او اربع ساعات …"وعصبت" وبعدين انت وش دخلك فيني …"قربت منه تاخذ الصحن .. بس امها مسكتها "
ام روضه "تطالع في بنتها بعصبيه":روضه .. وش صار لك يا بنتي …الاكل برا بالصاله وبتاخذين هالصحن من الولد يالله روحي خلصي اكلك …
بتال "يطلع لها لسانه":… يا دبا … ما يكفيك اللي بالصحن هناك … ارحمي حالك ..كفايه سمنه وسكر وش باقي تبغين اكثر…
روضه "بعصبيه": مالكم دخل فيني …. خلوني على راحتي …"وطلعت من المطبخ … وراحت على الطاوله .. مكست الملعقة وصارت تاكل بسرعه.. وهي شادة نفسها ومعصبة"..
ام روضه "بلا اهتمام":روح روح يمه … كله بالعافيه …
بتال "بتردد":اخاف يوجعني بطني نفسها فيه …
ام روضه "بسخريه": وايش اللي روضه ما نفسها فيه …
بتال "ابتسم":اذا على كذا … مشكورة يا خالتي … يالله انا بطلع .. توصي شي …."وهو طالع من المطبخ متجه لباب الشقه"
ام روضه : سلامتك يا ولدي … بس قول لامك تكلمني لان تلفوننا استقبال ما سددنا الفاتورة ….
بتال : تامرين امر …مع السلامه "وطلع من الشقه".
ام روضه "تقفل الباب … وابتمست ": الله يسعدك يا بتال ويوفقك يارب …"تذكرت روضه .. أخذت نفس دليل قلة الحيله"… الله يهديك يا روضه …
دخلت ام روضه للصاله وجلست مقابل لبنتها اللي تقريبا اكلت اكثر من نص الصحن وهي مو حاسه …
ام روضه : خلاص خلاص يا بنتي … لا تكثرين الله يهديك …
روضه : مو قلت لكم اذا انا معصبة لا تكلموني …خلوني اهدا اول ..
ام روضه : لا يا بنتي ما بخليك … عندي تتكلمين افضل من انك تسكتين وتطلعين حرتك بالاكل …
روضه "وزادت في سرعة اكلها"
ام روضه : يا بنتي ايش صار لك … ليه ما تقولين لي …
روضه "تذكرت ان سميرة ما شجعتها على الرجيم ":..محد يحبني ولا احد يساعدني …
ام روضه : ايش عندك يا بنتي تكلمي …
روضه : ابغى اكل … وبس…
ام روضه "بحزن": اللي يريحك يا بنتي …
…………………………………
في شقة ام بتال ..
سميرة بغيض مكتووم تطالع في بتال اللي جالس ياكل من اكل ام روضه …..
بتال "يطالع في سميره .. واختفت ابتسامته": …..وليه ما تضحكين … بس فاتك شكل روضه على الطبيعه والا كان متي ضحك ..
سميره : بتال … انت ما صرت صغير… كم مرة قلت لك لا تكلم روضه كذا … انت عارف اللي فيها مرض .فلا تتشمت فيها ..
بتال : أي مرض واي خرابيط ..هي بس لو تمسك فمها ويدها ..ما بتمتن … شوفيها كانها فيل …
سميره "بعصبيه": بتال لا تقول كذا عنها …
بتال : وش فيك معصبة علي … ترى روضة مثل اختي ما اتريق عليها ترى اقول لها هالكلام في وجهها عادي ..
سميرة "بضحكة استهزاء": .. ماشاء الله عليك … اختك هاه … اجل المفروض اول واحد يوقف معاها انت …"وكانها تذكرت شي"… تعال هنا … كم مرة قلت لك لا عاد تسلم عليها في خدها … ما يجوووز انت مو اخوها …
بتال :أوووه هووو … رجعنا …انا مثل اخوها …
سميره "باصرار":لا …منت اخوها ….
بتال "بملل": وش فيك انتي قلبتي علي مرة وحده محاضرات ومواعظ… مو انتي قلتي لي قبل سنتين ما اسلم عليها الا في المناسبات وبس …"وكتف يده" .. فهميني الحين ايش تغير…
سميره "بنفاذة صبر":.. اللي تغير ان انت كبرت …
بتال : حتى هي كبرت وانتي … وامي .. وخالتي منيرة ..و
سميرة "تقاطعه":بس بس … بتال اللي اقصده انك .. انك .. انك صرت رجااال … يعني كلها سنتين ثلاث .. وتتزوج …
بتال "ابتسم":.. والله …وناسه ..
سميره "ضحكت بتعب":.. قولي لي الحين وصلت المعلومه اللي ابيك تفهمها والا لا …
بتال "يرمش بعينه": فهمت فهمت … تبون تفرحون فيني … بس قولي لي مين البنت …انتو حاطين عينكم على مين …عشان بس "وغمز لها" اهييء نفسي…
سميرة "سميرة فتحت عيونها فيه وسحبت شعرها":… يا ناس بيهبل بي هالولد .."وقامت من عنده وهي معصبة من تناحته "
بتال "طالع فيها ببرود": الحمدلله والشكر …."ورجع ياكل وهو يتذكر شكل روضه لما شافته ماسك الصحن "…يقطع ابليسها اكوله بشكل..هههههه
في العصر … خرجت ام روضه من غرفتها وهي لابسه عبايتها .. وراحت للصاله ..و وقفت لما شافت روضه جالسه قدام التلفزيون وماسكه كيس بطاطس كبير وعلى الطاوله قدامها اثنين ببسي وصحن كبير مكسرات …
ام روضه "تحط يدهل على راسها": ول ول وش تسوين يا بنتي …
روضه " وهي تاكل بحماس .. وعيونها مركزة على التلفزيون": ..اتابع الفلم …
ام روضه : ليه منتي جايه معاي عند ام خالد؟! …
روضه "بسرعه": لا ..
ام روضه : ليش .. اذا على الفلم بينعاد اكثر من مره … "وبصوت حنون"قومي يمه اطلعي معي شوفي الناس غيري جو بدال حبسة البيت هذي …
روضه : رحت لسميرة الصباح .. وغيرت جو … عادي يمه روحي لا تتاخرين عليهم ..
ام روضه :.. وانتي ايش بتسوين …
روضه : ولا شي بتسلى بالتلفزيون حتى ترجعين …"وتطالع في امها" الا متى بترجعين ؟
ام روضه "وقفت": مدري على حسب مزنه "ام بتال" متى ما قالت يالله قلت يالله …
روضه "برجاء":يمه تكفيني مري السوبر ماركت .. نفسي في حليب بالشوكولاته … تكفيييين …
ام روضه "سوت نفسها ما سمعتها ": مع السلامه …"وطلعت من البيت وهي تفكر في بنتها اللي بس همها اكل ونوم"…
تقابلت ام روضه وام بتال وسميرة عند باب العمارة وراحوا لجارتهم ام خالد في فلتها الجديده ..
ام خالد كانت ساكنه معاهم في العمارة وهي مديرة مدرسه … جمعت فلوسها على فلوس زوجها وبنو لهم فله متوسطة الحجم ولكن فخمه قريب من عمارة ام بتال وام روضه .. لانهم تعودوا على الجيران وعلى الحي ..فما حبوا ينقلون منها ….
ام خالد .. تزوجت متأخره بعد الـ 35 سنه …وجلسة فترة تحاول الإنجاب لحد ربي ما رزقها بالتوأم خالد .. وخالده وعمرهم سنه
في فلة ام خالد ….
ترحب ام خالد بالجيران اللي اجتمعوا عندها .. يباركون لها في فلتها الجديده ..
ام خالد : الله يحييكم كلكم ومشكورين على جيتكم …
ام روضه "لفت عليها" : حتى روضه تسلم عليك ..
ام خالد : الله يسلمك ويسلمها.. "وخفضت صوتها حتى صار الكلام بينهم" وينها روضه ماجت معاك …؟!!
ام روضه "بحزن": انتي تعرفي حالتها ما رضت تطلع …
ام خالد : اه الله يعينها .. بس المفروض …ما تحبس نفسها ..
ام روضه : والله قلت لها بس ما باليد حيله …
ام خالد : ما دورت لها وظيفه ..
ام روضه : من وين يا حسره … انتي تعرفي هي ما اخذت الا اول جامعه وبعدين فصلت منها بعد ما البنات صاروا يعلقون عليها عشان وزنها …
ام خالد "وبصوت واطي ":اقول ام روضه .. بعد ما يروحون الحريم ابيك بموضوع ..
شقة ام روضه …
دق باب الشقه وراحت روضه بكسل تفتح الباب وهي متملله وماسكه بيدها ايس كريم ….فتحت الباب …ودخل بتال …
بتال : سلام روضه … أهلي عندكم ..؟!
روضه "وهي تاكل الايس كريم.. هزت راسها بلا"
بتال : طيب وينهم ؟؟
روضه "وهي تاكل الايس كريم ":ام خالد …
بتال "مل منها .. ":اقول انتي ما تعرفي توقفي شوي عن الاكل وتكلميني مثل الناس …
روضه "تهز راسها بلا"..
بتال "عصب":.. انا اوريك يا لا …"وسحب الايس كريم من يدها .. وهرب لداخل الشقه ".. احلمي اعطيك …
روضه "بلمت فيه شوي": بتالووه.."وراحت تركض وراه بصعوبة .. ونسيت باب الشقه مفتوح".. يالدب بيذوب …هاتيه …
بتال يضحك .. وهو يهرب بالايس كريم …وجالس يدور حوالين الصاله والمطبخ .. وروضه تركض وراه .. وقف ..جلس ياكل من الايس كريم عشان يغيضها …
بتال : امممممممم احلى ايس كريم ذقته بحياتي ….
روضه "ونفسها منقطع من الركض .. وبقهر ": عساك بالمغص يارب ….
بتال "يضحك بقوه ..": . يعجبني استسلامك …
روضه "شمقت له .. وجلست باستسلام على الكنب بالصاله":..
بتال "قرب منها ": . وتعجبني نظراتك ..
روضه "كتفت يدها .. ورفت يدها لشعرها تعدله":
بتال "اكل اخر ملعقة من الايس كريم.. وجلس جنبها":ويعجبني شعرك …
روضه "طالعت في الايس كريم شافته مخلص .. وانقهرت ": نقطنا بسكاتك …
بتال"ضحك" : وربي تعجبيني لما تعصبين …"وطالعها بنظرات مركزة"
روضه " ركزت في التلفزيون .. تضيع السالفه":ا ا ا .. اهلك عند ام خالد جارتنا…
في فلة ام خالد … وبعد ما راحوا كل الحريم … وباقي بس ام روضه وام بتال وسميرة ..
ام روضه "بقلق": خير يا ام خالد .. وش الموضوع اللي بغيتيني فيه …!!!
ام خالد "ابتسمت": الخير بوجهك …انا عندي عريس لبنتك روضه ..
ام روضه "تهلل وجهها": عريس … مين يا ام خالد …
ام خالد : ابوي ….
ام بتال :.. ابوك ؟! ..
ام خالد : ايه ابوي … تعرفون محتاج احد يساعده ويونسه في البيت بدال الشغالات …
سميرة "بزعل":.. بس هو اكبر من ابوها … وهي لسى في العشرينيات ..
ام خالد : بس روضه حالتها صعبة .. مين بيتزوجها وهي بالشكل هذا ..الحين الشباب ما يبغون الا جسم عارضات ازياء ..
ام روضه "وكان الصدمة .. خلتها تسكت"
ام بتال : بس ولو روضه صغيرة على ابوك …
ام خالد "وكانه ما عجبها كلام ام بتال وبنتها… لفت على ام روضه":… اسمعيني يا منيرة .. روضه اذا ما تزوجت ابوي يمكن ما تتزوج طول عمرها … خليها تجرب الزواج ولو مره بحياتها …"وحطت يدها على رجل ام روضه".. فكري انتي وبنتك وردوا لي خبر …
ام روضه "ابتسمت لها بصعوبه .. و وقفت":الله يكتب مافيه الخير.."وطلعت من فلتهم حتى ما انتبهت لام بتال اللي تكلمها تنتظرها هي وسميرة"..
في شقة ام روضه …
بتال .. يطالع في روضه وهو لاف جسمه عليها ….
روضه : يالاخو ترى مضيع .. التلفزيون الجهة الثانيه مو بوجهي …
بتال "ضحك": .. انتي احلى من التلفزيون …
روضه " رمت الريموت وعدلت جلستها ولفت وجهها لوجهه": .. انت وش عندك من لما جيت وانت مطيح الميانه …
بتال "نزل عينه وبعدين رفعها لشعرها.": انتي ليه مره تلبسين طرحه على شعرك اذا شفتيني ومرات لا …
روضه "بلا اهتمام": .. كذا مزاج …
بتال : طيب انا احسك مثل سميرة اختي …
روضه : طيب ..وبعدين …
بتال : يعني ليه ما سلم عليك ولا احضنك ولا اقرب منك …
روضه "فتحت عيونها ": .. هييييي هيييي .. ايش تقول انت "فركت جبينها .. وتنفست بقوه"…بتال .. انت الحين بتروح الجامعه يعني كبير المفروض تفهم ….انا مو اختك …
بتال : بس احس انك اختي واحبك .. واذا جاء يوم ما شفتك فيه اشتاق لك …"دمعت عيونه" .. تصدقين.. ما ابغى اسافر ادرس برا اذا تذكرتكم ..
روضه "بلعت ريقها .. وحزنت عليه": .. حتى انا يا بتال اعتبرك مثل اخوي … بس المشكله انت مو اخوي .. ولا بيننا رضاعه …
بتال : بس احنا تربينا مع بعض …
روضه "ابتسمت": ايه .."وضربته على راسه"الله يهديك ليتك قدمت خمس سنوات عشان نصير أخوان بالرضاعه …
بتال : ما بيدي شي ….
دخلت ام روضه الشقه ويدها على قلبها لما شافت الباب مفتوح …ام بتال وسميرة دخلوا وراها .. وهما يمشون شوي شوي .. خايفين لا يكون صار لروضه شي …
ام روضه "بخوف":الله يستر لا يكون بنتي صار لها شي …
سميرة "ترجف خوف": لا يكون فيه حرامي معاه مسدس ..
ام بتال : فال الله ولا فالك … اسكتي الحين …
مشوا يتسحبون لحد ما دخلوا على روضه وبتال وهما يضحكون .. وجالسين جنب بعض ….فتحوا عيونهم لما شافوهم داخلين بدون ولا صوت ولا حركه …
وقفت روضه وبتال …
روضه "حطت يدها على صدرها": بسم الله علي … من وين جيتوا مالكم صوت …
سميرة "تمشي بشويش وتجلس على اقرب كنبه وترمي نفسها بقوه": اشواا لا حرامي ولا شي ….
بتال "مستغرب": حرامي ؟!!
ام روضه "بنظرة عتاب": ليه باب الشقه مفتوح ..؟!
روضه وبتال طالعوا في بعض … وضحكوا …. وقالوا لهم سالفة الايس كريم …
ام بتال "بعصبيه": انت يا بتال ما تبطل من حركاتك هذي …
بتال "بلا اهتمام ":مع روضه … نو ما راح ابطل …
سميرة "مقهوة من اخوها لانه ما يفهم لما تقول له ما يجوز يجلس معاها ": .. بتال وبعدين عن الاستهبال …تراك كبرت …"و وقفت ونزلت طرحتها من على راسها وعطتها روضه ".. شكلك نسيتي تلبسيها …
روضه : كله من الايس كريم …
بتال "فطس ضحك ": هالبنت تنسى نفسها لما تشوف الاكل ….
ام بتال "وقفت ": يالله بروح انا …يالله يا بتال …"وقف بتال" ..
ام روضه : اجلسوا تعشوا معانا ….
بتال ..رجع يجلس دليل موافقته على انه يجلس للعشاء … ولكنه رجع يوقف لما اخته سميرة عطته نظرة قويه بمعنى قوم ..
سميرة : يمه انا بجلس شوي مع روضه .. وبعدين الحقكم ..
ام بتال" وهي طالعه ": طيب بس لا تتاخرين ….
وطلعت هي وبتال و وراهم ام روضه توصلهم للباب … في هالوقت سميرة سحبت روضه لغرفتها وقفلوا الباب …
روضه "وعيونها كلها تساؤلات": خير سميرة وش فيك .. شكل عندك شي … "ابتسمت" .. شكلك جايبه لي رجيم حلو …
سميرة : لا وش رجيمه …"جلست على حافة السرير وابتسمت": انتي تعتبريني اختك …؟! صح والا لا …
روضه "بملل": وش فيك انتي واخوك اليوم …؟! … شكلكم ناوين تقلبوا علي …
سميرة "باهتمام": بتال …ليه ايش قال لك …
روضه "وهي تجلس جنبها على حافة السرير": يقول انتي اختي ولا اعتبرك الا اختي ..ومدري وشو …
سميرة : المهم … روضه انتي تعرفي بتال الحين بيدخل الجامعه .. وترى هو متعود عليك كثير .. وما بينكم حدود …وهالشي ما يصير يا روضه ..فاهمتني …
روضه "تحاول تفهم": .. بس بتال مثل اخوي .. وبعدين انا اكبر منه بخمس سنوات …"حمر وجهها دليل الضيق" .. واي حدود تقصدين مو موجوده …
سميرة : روضه انا اكبر منك ومنه بعد وفاهمه هالدنيا كيف … بس الحق حق .. وانتي مثل اختي لا لا مو مثل انتي اختي .. بس بتال لا مو اخوك …
روضه : بس انا ما عمري قربت منه ترى انتي فاهمه غلط …
سميرة : ادري ان انتي وهو متربين وفاهمين .. بس بالنهايه منتو أخوان .. يعني يجوز لك تتزوجيه ..
روضه "فتحت عيونها فيها": .لا بالله أنتي ماكله شي … ايش أكلتكم ام خالد .. "وضحكت".. شر البلية ما يضحك ..
سميرة : انا قلت اللي عندي …واتوقع انتي كبيرة لدرجة فاهمه ايش اقصد ."وقفت .. وسحبت طرحتها من على شعر روضه".. وعلى طاري الزواج … ترى جالك عريس"وغمزت لها" من طرف ام خالد …
روضه "اختفت ابتسامتها …ووقفت ":احلفي …. صدق … مين ..
سميرة "وهي تضبط عبايتها": اكيد خالتي بتقول لك … يالله باي "طلعت من الغرفة وسكرت الباب وراها"
روضه مو مصدقة اللي سمعته أخيرا احد فكر فيها وبيخطبها .. ابتسمت وهي ضامه يدها لصدرها .. جلست والافكار تدور فيها من كل مكان … "مين هذا اللي فكر يخطبني .. يا ترى قد شافني ومثلا أعجب فيني .. آه يا سميرة وقفتي قلبي ".. رجعت الى كلام سمير في بداية جلستهم عن بتال.."ياترى ايش اللي خلى سميرة تقول هالكلام .. انا اعرف سميرة دقيقة الملاحظة من الدرجه الاولى .. قالت يجوز اتزوجه .. اتزوج بتال !!.. مستحيل".. ضحكت لما تخيلت الموقف .. بس فيه شي خلاها توقف ضحكتها .. وكانها اول مره تركز في بتال .."بتال تغير كثير فعلا .. صار اطول مني وعنده شنب .. نظراته صارت دقيقة .. صوته خشن بزيادة صوت رجولي .." .. بلعت بصعوبه .."كأني اول مرة الاحظ انه فعلا كبر .. يااه يالدنيا تمر بسرعه بدون محد يلاحظ .. وين بتال اللي كنت اشيله وادافع عنه واخاف عليه ..واحــ ـ ـ ـبـ ـ ـ ـه "..دقات قلبها بدات تزيد .. لفت راسها يمين ويسار تبعد الافكار عنها .."مثل اخوي مثل اخوي…احبه مثل اخوي .." قطع عليها تفكيرها ..
…: روضه يالله يا بنتي العشاء ..
روضه "بصوت عالي": طيب طيب يا امي …الله يسامحك يا سميرة ايش سويتي فيني ..
في شقة ام بتال …
ام بتال وسميرة وبتال على العشاء …
بتال "مفتح عيونه": .. انخطبت .. لابو ام خالد …
ام بتال : ايه طلبتها اليوم من امها قدامنا …
سميرة "تلاحظ ردة فعل بتال "…
بتال "بعصبيه": .. من جدكم انتو .. هذا كبر ابوها وعاجز ..
ام بتال : كل بنت ونصيبها …
بتال : لا لا حرام والله تدفن حياتها مع شايب …
سميرة "ركزت عيونها على بتال": .. وليه لها الدرجه متضايق ..
بتال : بالله هالشي ما يزعل .. بنت في العشرين تاخذ شايب في الثمانينيات ..
سميرة : بس وضع روضه مختلف .. سمنتها خلت الخطاب ما يجون لها ..
بتال : سمنتها ما لها دخل في نصيبها .. واكبر دليل انتي …
سميرة "بحزن": تعايرني لاني ما تزوجت لحد الحين …"وقفت" ترى انا اختك مو روضه …
بتال "وقف وبعصبيه": انتي اختي وروضه اختي … وزواجها من هالشايب ما راح يتم يعني ما راح يتم ..
سميرة "طالعت فيه بقهر … وراحت لغرفتها تركض"..
ام بتال :.. سميرة سميرة …. "طالعت في بتال" … ليه تقول لاختك هالكلام الزواج قسمة ونصيب ولحد الحين ما جاء نصيبها ..
بتال "حط يده على وجهه": .. اعوذ بالله من الشيطان ..يمه ما كنت اقصد اجرحها … بس والله سميرة وروضه مثل عيوني الثنتين … مستحيل افرق بينهم …
ام بتال : يمه سميرة تحملت كثير .. فلا تزيد عليها … من لما توفى ابوك .. وهي تشتغل وتساعدني في مصروف البيت .. حتى انها دخلت معهد حاسب عشان تتوظف بسرعه وتركت الطب عشانا …وانت تدري من لما كان عمرها 15 سنه وهي يخطبوها كثير بس رفضت عشانك وعشاني… ولا انتبهت لنفسها الا وهي تعدت الثلاثين … وسبحان الله ولا عاد شفنا لا خطاب ولا غيرهم …
بتال "تضايق من نفسه ": .. يمه قلت لك ما اقصد … "وقف".. بروح اشوفها …"ولف رايح لغرفتها "
ام بتال "ابتسمت": الله يرضى عليك يا ولدي ..
في شقة ام روضه ….وعلى العشاء .. ام روضه تطالع في روضه اللي ما اكلت الا شوي وطول الوقت سرحانه ..
ام روضه "باستغراب": روضه … وش فيك ما تاكلين …
روضه : هاه … هذا انا اكل يمه …
ام روضه : لا لا .. انتي فيك شي ..
روضه : مالي نفس يمه للاكل …
ام روضه "بخوف": خير يمه تعبانه ..؟! فيك شي ؟! السكر ملخبط معاك …
روضه "ابتسمت": لا لا يمه والله انا بخير … بس ودي اخفف اكل من اليوم ورايح … "وفي نفسها .. عشان فستان العرس يضبط علي "..
ام روضه "بتعجب": تخففين ..!!! …
روضه "يا ويلي لا تكشفني اني اعرف عن سالفة العريس": .. ا أ أيه يمه مو انتي دائما تقولي لي اخفف اكل … خلاص باسمع نصيحتك اليوم وبلاش رجيم وخرابيط …
ام روضه : يالله عسى بس دوم …مو بس اليوم تتحمسي وبكرة تخربيها …
روضه : لا ما عليك عندي حماس هالمره …"وقفت " الحمدلله شبعت .."وراحت غرفتها وهي تهرب من عيون امها اللي كلها تعجب"
في شقة ابو بتال …. وفي غرفة سميرة …
بتال دق الباب ودخل على سميرة اللي كانت تبكي بقهر على عمرها اللي ضاع وهي تضحي ولا احد مهتم فيها ….جلس بتال على كرسي مكتب الكمبيوتر … ولف عليها .. وبصوت كله حنان …
بتال : سميرة انا اسف .. والله ما كان قصدي اجرحك ..
سميرة "زادت في بكائها"
بتال "بحزن": خلاص سميرة .. انتي اختي الكبيرة ..ما احب اشوفك تبكين …
سميرة "وهي تبكي": .. ايه انا حرام علي البكاء والاحترام والحب … لاني الكبيرة .. بس اراعيكم ولا تراعوني … اهتم فيكم ولا تهتمون فيني …انت وروضه تعتبروني الاخت الكبيرة اللي كانها ملاك .. الواجب عليها تعلمكم وتفهمكم .. وكأن ما عندي مشاعر ولا احاسيس ولا اهتمامات .. حتى لو حبيت اتكلم قلتم الاخت الكبيره .. ما يحتاج تتكلمي … طيب حتى انا ابغى يكون عندي اخت كبيرة تهتم فيني … مثل ما انت وروضه تهتموا ببعض …حتى انك تهتم فيها اكثر مني مع انها اكبر منك …"ورجعت تبكي" ..
بتال "زفر": .. سميرة وش هالكلام .. بالعكس انتي القدوة واحنا نحبك ونستشيرك لانك ماشاء الله فاهمه الحياة وذكيه … اما انا وروضه "وضحك"الله يخلف علينا ماشين على البركه … وترى روضه اعزها مثل معزتك ..
سميرة "هديت شوي ": .. بس هي مو اختنا …
بتال "ابتسم ": لو انتي مو معتبرتها اختك كان ما جمعتيها معي في كلامك اول مرة …
سميرة "نزلت راسها منحرجه .. انه كشفها " : ايش اسوي غصب عني احبها واعتبرها اختي … من لما كنا صغار واحنا مع بعض ..
بتال : شفتي مشاعرك تجاهها ..هي نفسها مشاعري تجاهها …
سميرة : اجل ليه ما تبغاها تتزوج …
بتال : هالشخص لو تقدم لك راح يكون موقفي هو نفسه معاك مستحيل اوافق تتزوجي برجال شايب … يا سميرة انتي وروضه خواتي وما ابغى لكم الا كل خير …
سميرة : بس انت كذا تخليني اغار منها …
بتال "ضحك": .. والله شكلي باسحب مسمى الاخت الكبيرة منك …
سميرة "بتريقه": لا بالله ..وباي صفه…
بتال : بصفة اني بصير وكيل عليكم …
سميرة "ابتسمت": والله وكبرت يا بتال …
بتال "ضحك .. ويمسح على شنبه باصابعه": .. توك تلاحظين …
"وقف .. ومد يده لها" يالله تعالي خلصي عشاك.. بلا دلع …
……………….
مر يومين وروضه فرحانه بسالفة الخطوبة .. مع ان امها ما فاتحتها بالموضوع بس هالشي خلاها تتحمس تنقص وزنها .. وفعلا نقصت 2 كيلو …
… دق تلفون ام روضه في صباح يوم الاربعاء…
روضه "بملل": الوو ..
….: الوو .. روضه !؟
روضه : ايه مين معي …
….: ام خالد ..جارتكم ..
روضه "بلعت ريقها ..":..هـ هلا يا ام خالد كيفك وكيف خالد وخالده ؟!
ام روضه سمعتها وعرفت انها ام خالد .. وجت تركض
ام خالد : بخير الله يسلمك .. كيفك انتي ..
روضه "وتطالع في امها وهي تجلس جنبها": الحمدلله ..
ام روضه : هات السماعه …"وسحبتها منها ".. حيا الله ام خالد ..
ام خالد : هلا ام روضه .. شخباركم ..؟!
ام روضه "تاشر لبنتها تروح غرفتها": الحمدلله ..
ام خالد : هاه يام روضه ما رديتوا علينا …
روضه قامت راحت غرفتها .. ووقفت ورا الباب تسمع مكالمة امها مع ام خالد ..
ام روضه "لما تاكدت ان روضه راحت": يا ام خالد تعرفي هذا زواج .. اعطي بنتي فرصة تفكر …
ام خالد : السالفه ما يبي لها كل هالوقت .. ترى احنا مستعجلين على الزواج ..
ام روضه : والله يا ام خالد يمكن مافيه نصيب ..
روضه .. وقف قلبها وهي تسمع امها .. "معقول امي ترفض زواجي ولا تخبرني .."
في شقة ام بتال …
دخل بتال شقتهم .. وسميرة وقفت لما شافته داخل … وعلامات الحزن على وجهه …
سميرة "رافعه حواجبها": .. بتال ايش صار ؟!
بتال "رمى المفاتيح على الطاوله .. ورمى نفسه على الكنب ": .. السفر يوم السبت ..
سميرة "بفرح": .. الف الف مبرووك …واخيرا ..
بتال "ابتسم مجامله": الله يبارك فيك …
سميرة "جلست جنبه ":وليه كذا تقولها بدون نفس ..
بتال "نزل عيونه":لا ولا شي … بس بفقدكم …"دمعت عيونه"..
سميرة "تاثرت بكلام اخوها ودموعه":.. بتاال .. لا تخليني ابكي .. "حطت يدها على كتفه "….. انا من زمان انتظر اليوم اللي بتسافر فيه وترجع لنا افضل مهندس بالمملكه …
بتال "مسح دموعه بسرعه":وين امي …
سميرة : عند الجيران …ام محمد اللي فوق …
بتال "وقف" : .. بروح عند خالتي منيره "ام روضه"… "طالع فيها " تسمحين لي ..؟!
سميرة "انحرجت":.. انا ما منعتك تزورهم …بــ ــ ـس..
بتال "لاحظ احراجها.. فقاطعها وهو يضحك ": طيب طيب ..اا رايح توصيني شي …
سميرة "راحت غرفتها":.. سلامتك ..
ضحك بتال .. واخذ المفاتيح وراح لشقة ام روضه …….
روضه طلعت على امها بعد ما قفلت ام خالد .. ولما وصلت عند امها وفتحت فمها …
روضه "منقهره": .. يمه انــ ــتــ ـــي …
دق جرس الشقه … زفرت روضه بقوه وراحت تفتح الباب وهي معصبة ومنقهره من امها اللي في نظرها تحرمها من الزواج .. فتحت الباب ولقيت بتال في وجهها …
بتال "كان متكي على الباب .. وملامحه هاديه .. عكس شخصيته المرحه.. طالع في روضه بنظرات مركزة ": كيفك روضه …
روضه "وهي لسى معصبه": هلا … تبغى تدخل ادخل امي بالصاله …"وراحت وتركته واقف عند الباب .. مستغرب منها "..
دخل بتال … عندهم بالصاله … وشاف روضه مكتفة يدها وجالسه بزعل .. وام روضه بضحكه مصطنعه …
ام روضه : هلا بولدي بتال .. حياك ادخل …
بتال "طالع فيها": الله يبقيك .."قرب منها وباس راسها .. ولف على روضه ".. وش فيك ياروضه منتي طبيعيه …
روضه "وهي مادة بوزها": .. مافيه شي .. "وقامت راحت المطبخ "
بتال : وش فيها يا خاله ..؟!
ام روضه : مافيها شي … "تغير الموضوع".. ايش اخبار امك وسميرة …
بتال "رجعت ملامحه حزينه":كلهم بخير بس انا يا خاله اللي مو بخير …
ام روضه : بسم الله عليك وش فيك …
بتال : مسافر يوم السبت ..
روضه "رجعت عندهم وبيدها صحن مكسرات وببسي ":… ايشش بتسافر يوم السبت ؟! …
بتال : ايه …"وابتسم".. لا الحين انتي روضه مافيك شي …
ام روضه "تطالع في بنتها": .. الله يهديك وين اللي بتخففين ….
روضه"بعصبيه" : انتي تدرين ليه …
بتال : روضه عيب عليك لا تردين على خالتي كذا …"لف لام روضه" .. المهم يا خاله حبيت اعطيكم خبر .. وبرضه فرصة لو محتاجين شي هاليومين قبل اسافر تقولون لي …."و وقف"..
ام روضه : سلامتك يا ولدي … وتروح وترجع لنا بالسلامه يارب. .. اجلس وين رايح ..
بتال : عندي كذا شغله بخلصها … "وكانه تذكر شي ".. أ أ خاله .. ممكن اطلب منك طلب ؟!..
ام روضه : خير اطلب يا بتال …
بتال "بحرج": لا توافقين على خطبة روضه اللي من طرف ام خالد …
ام روضه "تطالع في بتال وفي ردة فعل روضه .. بارتباك"…
روضه "فتحت عيونها":.. حتى انت … حتى انت يا بتال …." ورمت الصحن … ووقفت …."
ام روضه وبتال … يطالعون فيها مستغربين ردة فعلها …
روضه "معصبة": .. ليه كلكم واقفين ضد خطوبتي … ليه ما تبغوني اتزوج "بدأت دموعها تنزل"… ليه مستكثرين علي افرح … "وتاشر على نفسها" .. انا اللي باتزوج وانا اللي اوافق او ارفض مو انتو اللي تقرروا … كلموني استشيروني طيب .. حسسوني اني انسانه .. حرام عليكم ..حرام عليكم …"وجلست وهي حاطة يدها على وجهها وتبكي"..
ام روضه : يا بنتي أ ..
روضه "بقهر": لا احد يكلمني مابغي اسمع شي .."ووقفت بتروح غرفتها .. بس بتال مسك يدها"
بتال "وهو ماسك يدها": انتظري ابغى اتكلم معاك …
روضه "بعصبيه": قلت ما ابغـــ ـــى .."وبخوف".. اتركني …
بتال "مفتح عيونه بعصبيه وراص على اسنانه": قلت لك باتكلم معاك ..
روضه استسلمت له وجلست لانها اول مرة تخاف منه وتشوف عصبيته … وجلس بتال جنبها … اما ام روضه راحت لغرفتها والدموع في عينها من حال بنتها …
بتال "حاول يكون هادي": ..انتي فاهمه الموضوع غلط …
روضه "طالعت فيه بنص عين .. وهي معصبة":.. ايش يعني محد خطبني …؟!
بتال "ابتسم من عصبيتها": .. لا لا انخطبتي … بس انتي تدرين مين خطبك …"وشافها ساكتة دليل انها مو عارفه" .. طيب .. انا اقول لك … يصير ابو ام خالد …"روضه وكانها مو مستوعبه".. ايه .. ايه ابوها الشايب العاجز اللي أحيانا ما يتذكر حتى بنته ..
روضه "والصدمة واضحه عليها": هاااه.. من جدك…
بتال "بكل ثقه": .. وجد الجد … هاه ايش رأيك فيه ..؟!
روضه " طالعت فيه ودمعت عيونها .."
بتال : الحين ليه تبكين …"وضحك لها بغمزه"..لها الدرجه مستعجله على الزواج ..
روضه "حمر وجهها وهي تبكي .. ووقفت بسرعه رايحه لغرفتها "
بتال "ضحك يطالعها وهي رايحه .. بس غصب عنه رجع لحزنه لما تذكر سفره… وقف .. وبصوت عالي ":… خالتي منيرة انا طااالع …
تــآبعي .. وننتظر منكـ الأجزآء القــآدمة =)
يسعدنا عودتك معنا بروايه جديده
الروايه حلوه اعجبتني
متابعه لك واصلي
بصرااااحه الروايه رووووووووعه
بانتظار التكملة
اتمنى ماتطولين عزيزتي
يسعدنا عودتك معنا بروايه جديده
الروايه حلوه اعجبتني
متابعه لك واصلي
اهلييين بالغاليه مزون شمر … نورتي روايتي الجديده ….
اتمنى فعلا انها تعجبك … واسفه على التأخير …
شاكرة لك تفاعلك معااي …
أإهلن ـأإهلن ..
تســ’ـــــلمين حبيبتـــ’ــــــي ..
بصرااااحه الروايه رووووووووعه
بانتظار التكملة
اهلين بالغلا مزمز ….
انتي الاروع … وتابعيني …
منورة
الجزء الثاني
>>>>>>>>>>>>>>>>>>>>>>>>>>>>>>>>>>
قطع عليه حبل أفكاره ..صوت سيارة "يزيد" تفحط بقوه وراه …
بتال "لف عليه بسرعة": الله يقطع إبليسك خوفتني…
يزيد "يأشر له من الشباك": اركب اركب بسرعه …
بتال "ركب وسكر الباب": خير وش عندك بسرعه … لا يكون ماخذ السيارة كالعاده بدون استئذان …
يزيد "يضحك": يس .. كالعاده …
بتال "تضايق": .. يؤ يزيد من جدك الحين ما راح نتهنا في طلعنا .. راح يعاقبك أبوك مثل المرة الاخيره ..
يزيد : .. معليك انت .. بتمر بتمر .. والعقاب بناخذه وننتهي … بس مستحيل اسمع صوتك متضايق .. واجلس بالبيت …
بتال : صدق لا قالوا الصديق وقت الضيق …
يزيد : خير بتال وش فيك ..
بتال "مسرح بالطريق": .. بسافر يوم السبت …
يزيد "لف وجهه عليه ": من جدك … جت الموافقه يعني …
بتال : ايه …. "وزفر "…ايه جت ..
يزيد : طيب المفروض تفرح .. بس وجهك ما يتفسر الصراحه .. "لما طول ما رد عليه "..تحب اوقف في مكان ..
بتال :ايه ياليت ..
يزيد بدون ما يكثر كلام اتجه لمكانهم المعتاد على كورنيش جده .. لانه عارف بتال ما يسكت الا اذا الموضوع كبير …
…………………
في شقة ام روضه … روضه وامها بالصاله ..
روضه رجعت لعادتها القديمة في الأكل .. كل شوي وهي ماكله شي او شاربة شي … تحس بالضياع اذا ما دخلت المطبخ كل ساعة …
روضه "تقلب القنوات بملل وبسرعه "..
ام روضه " وهي تقطع الملوخية": ..انتي الحين ليش ما توقفين على أي قناة .. ترى ادوشتي راسي …
روضه : مافيه شي حلو كلها مللللله ..
ام روضه "تطالع في التلفزيون": طيب شوفي هالتمارين الرياضية يمكن تنفعك .. او تتعلمي منها شي …
روضه "بملل": يؤ.. يمه ما ابغى اشوف التمارين اصلا هي كلام فاضي ..
ام روضه : لا مو كلام فاضي لو كلام فاضي كان ما شفتيهم بهالنحف ..
روضه "بيأس": انا كذا جسمي كذا مافيه امل انحف … شكلها وراثه .. مو ابوي الله يرحمه كان متين .. ليتني طلعت لك ..
ام روضه : الله يرحمه .. الله اعلم يا بنتي .. بس لو تبتعدين عن المقليات والرز والمكرونه .. وتمشين شوي بتنحفين …
روضه "بملل": .. يمه الوراثه مالها علاج …
ام روضه : الله يعين …"وتطالع التلفزيون".. .. ايوا خليه الشيخ المغامسي ..
روضه تركت القناة لامها تتابع وراحت للمطبخ ….
على الكورنيش ………………
يزيد : طيب ….!! ايش الجديد ؟!
بتال : كيف ايش الجديد …ما اقدر اتركهم وهما كذا ..
يزيد : يعني الحين اذا ما سافرت بيتغير حالهم …
بتال "بحزن": أول مرة أشوف سميرة وروضه كذا … كنت أفكرهم قويات ما يهزهم شي .. كنت بسافر وانا مطمن عليهم .. بس للاسف طلعوا مهشمات من جوا بس كل وحده تمثل القوه قدام الثانيه وقدامنا ..
يزيد "ابتسم": أمنيتي أشوف روضه وهي جديه … العاده بس تريقه ..
بتال : لو شفتها وهي تبكي ما عرفتها … مو روضه اللي تضحك وتمزح ..حتى "ضحك باستهزاء" تتريق على جسمها .. ولا عمرها زعلت من أي احد يعلق على جسمها .. بس طلعت غلطان .. البنت مرة حساسه .. وفي لحظة قوتها انهارت …"طالع فيه " كيف أسافر واتركهم ..
يزيد : طيب أمك وخالتك منيرة ..؟!
بتال "زفر بقوه": اتوقع من اللي صار لهم في حياتهم صارت سالفة بناتهم شي عادي …
يزيد "حط يده على كتفه": .. صل على النبي .. والله يكتب اللي فيه الخير … اهم شي الحين تفكر في دراستك وسفرتك … مع اني بفقدك … "بحزن".. بس يالله..ايش وراي انتظرك اربع سنوات …
بتال "لف عليه وشاف الحزن في عيونه ": .. لسى أبوك رافض موضوع دراستك …
يزيد "ضحك باستهزاء": يقول ما قدر يحكمني وانا قدامه .. فكيف بيقدر يحكمني وانا بعيد عنه …
بتال : يا يزيد قدر انك الولد الوحيد له .. وابوك ماشاء الله تاجر ..
يزيد : تاجر .."ويضحك".. تاجر ايه .. بس للأسف ما نعرفه ولا يعرفنا … تزوج ثنتين فوق امي عشان يمشي شغله بس… ما يدري عنا … تصدق ان خواتي الثلاث اللي اكبر مني لما تزوجوا ما كان له دور الا انه حضر الزواج مثلة مثل أي شخص ثاني …
بتال : بس انه مو مقصر عليكم ….
يزيد : صح مو مقصر في الفلوس.. بس حرام عليه معيشنا ايتام وهو موجود … والله ان هويدا …"اخته".. ما تعرفه .. تخيل قبل شهرين جاب لها عريس في مثل عمره … شايب يا بتال شااايب …
بتال : وش سالفة هالشياب ..ما يبغون الا بنات صغار …
يزيد : ليه فيه ضحيه مثل اختي …؟!
بتال :ايه … روضه جالها عريس شايب .. وقومت الدنيا وقعدتها …
يزيد "ضحك":.. اجل ايش رأيك انا تزوجني روضه وأنا أزوجك أختي ..
بتال "ضحك" : ياليت الأمور بهالسهوله ….ياليت …"وقف".. قوم قوم ودي اروح للسوق .. اذا ما بعطلك …
يزيد "وقف بسرعه": افااا قال تعطلني قال … يالله مشينا ..انت تامر امر ..