أسعد الله أوقاتكم بكل الخيرات والمسرات….
سيف هذا أزعجكم صح…كل شوي منزلن له تقرير….ماكأن يسافر إلا هو…ولاكأن
يطلع البر إلا هو….!!
ماتدرون أنا هاوي التصوير…تعرفون الولد مولود بإستديو15بوزارة الأعلام…(أقول لايكثر)
تتذكرون المصور اللي سوينا معاه عقد بسفرتنا اللي راحت…هذا جبناه اليوم يصور لنا
هالرحله اللي جت بشكل سريع ومفاجئ…بس تصدقون أحلى رحله بالنسبه لي
رغم تواضعها…في كل الأمور…
الطلعه ماخططنا لها إلا ومتأخرين شوي يعني يوم الأربعاء الماضي……حضرنا كل شيء ورتبناه..طبعا مايحتاج أقول لكم منو منسق الرحلات…ترى أول حرف من إسمه هو:سيف الملوك
شاطر يابابا….
إتجاه الرحله هي لمحافظة حريملاء..
طبعا وصلنا هناك على الساعه 8الصباح لخيمتنا اللي صار لها شهر مبنيه ولاطلعنالها إلا ذا اليوم….
هالكنب اللي بالخيمه ترى مو لي…هذا للعمده الله يطول لنا بعمره….
طبعا نزلنا كل أمورنا….وهذا هو فطورنا ..يسمونه الحنيني بالتمر طبعا…يدفئ في ذا
الشتاء مالك إلا الله ثمن هو…وخصوصا الشاي بالزنجبيل….طعم ولافي الخيال….
الموهيم خذيناها قصص…وسوالف لمين جت الساعه 1الظهر
وبداء سيف يشمر عن ذراعيه….طبعا هذا هو اللحم والدجاج المتبل
ومكعبات الخضار…واللي بالقصديره هذه..سر ماراح أقول لكم عليه
بس اللي بيكمل التقرير للأخير بقول له….ههههه
طبعا خفت على البزران من الجمر اللي كان شغال برى
فقررت أنتقل بكل عدتي لبرا
وبعدين أكمل
طبعا نسيت لأقول لكم تتذكروا المصور اللي سوينا العقد معاه..جاء لمي يترجاني
أجيب أخته هنا…يقول نب نشغلها أي شغله…تذكرت إلا البقدونس
شغله مره يتعبني…..فهذه هي….أصغر طباخه عندها مقدره فرم للبقدونس
حزمتين كل ساعه….ههههه
الموهيم والله ونبدأ طال عمركم باللي قلنا لكم قبل شوي عليها يللي بالقصدير..وهذه يسمونها
عرائس لحم….وهي عباره لحم مفروم وبقدونس وبهارات وملح تخلط مع بعض بالأضافه
إلى ملعقة زبادي..وطماطم مفروم….نخلطهم مع بعض ونحشي بها الخبز المصري
مدري وش تسمونه أنتم….!!
بعدين ندهن الخبزه بالزيت الزيتون…
ونحطها بقصدير بهالشكل
وبعد كذا نحطهم على الجمر ولانتركهم يطولون…حدهم 5دقايق لكل وجه…والجمر يكون خفيف
وهذا هو الشكل النهائي لها…جربوها تب تدعون لي بالخير
يتبع..
أول شيء اللحم
وهذه لقطه إحترافيه من المصور الله يرضالي عليه
الولد طلع فنان خوش ريال على قولة إخواننا الكويتين
وهذه الصوره النهائيه للحم بعد مانضج
بعد كذا بدينا باأفخاذ الدجاج والنقانق للأطفال مدمنين عليها
بعد كذا بدينا بشيش طاوق الدجاج
وهالمصور خذاها حلى كل شوي مسوي أنه حريف تصوير
يستاهل السوسو…شكلها يشهي…
وهذه لقطه خطافيه لبزاريننا وهم يلعبون بالرمل…اللي يب
يعمر له عماره بس يدق علينا وننسق له معهم الرد ب300ريال بس
وجاء وقت الغداء…بعد ماكل شيء صار جاهز…طبعا المقبلات هذه مجهزينها من البيت
وحاطينهن بحوافظ قصدير…بدينا مرحلة التوزيع…ياعيني والله خوش توزيع
عمود الخيمه هنا أحسه داخل غلط بالتصوير….لاولونه أخضر…يعيش شعب أبومتعب
وهذه صورة السفره بشكلها النهائي بعد إن تزينت بمشاوي سيف الملوك
يتبع…
قلت اجمع برد ليلي وهمي وحطبي ..
قلتها…واقصى ضلوعي ذياب عاويه !
الشتا يرثع ورا البال والليل يحبي ..
والطعون اقفت فرادا وجت متخاويه !
صاحبي لي مرك الشوق مره..مر بي ..
لا تجيني مع هجوس تجيني ضاويه !
آه يا صعب اغترابي بعدك ما اصعبي ..
عقبك الدنيا بعيني غدت متساويه !
هذه بيالة الذوق….
يتبع
اللي هو يسمونه الذره…وفي رواية أخرى حبش
مدري هل فيه ناس تسميه بغير هالمسمسيات أولا
وهذه صورته عقب مانضج….وأستوى….طعمه روعه بصراحه…بس قبل
لاتأكلون منه كل واحد يجيب بجيبه عود أسنان….
والله وأعجبت سيف لدرجة أنه خبأ وحده بجيبته..يقول يب يعطيها عامل النظافه….هههه
وفي ختام تقريرنا هذا لايسعني إلا أن أتقدم بالشكر لله أولا ولكل من
شرفنا بإطلاعه على هذا التقرير…ونقول له ترى مانسيناك
خوذ لك ملعقه وحلي بها يارب تحلى أيامك….وتسعدك لياليك
ولاتقولوا مابيكفي هالحلى…فيه بركه والجود من الماجود…
على فكره فيه شخص لازمن أوجه له دعوه…من هالمنبر
وهو بيعرف نفسه مين….!!
أقول له الشعب السعودي كلهم
ينتظرونك ترجع لأرض الوطن…وإنت حامل معاك شهادة الإمتياز
وأوعدك برحله فايف ستارز
وإلى لقاء أخر في تقرير أروع بمشئة الله
من سافرت ريم الغلا صديت عن كل الدروب
ماهو قصور بالعذارى ، بس ذيك لحالها
ولا لقيت الجادل اللي تستحق أحيا لها
والعشره اللي ماترد الروح ما نسعى لها
والا الجفاء اللي يستر عيوب العرب فرجالها
خانها التعبير في جملتها الاخيره 
قسم كنت مسجله خروج الا والمح شي تسن فيه بر
وطيران اسجل دخول (:
الله يديم عليكم هالاجواء يارب 
عفاك سيف بجد شي متعوب عليه
واهم شي سلم لنا عالمصور المحترف (:
يسعد ايامك اخوي سيف الملوك
ماشاء الله عليك شقردي وشيف على مستوا رفيع
بنسبة لي احلى مافي طلعات البر شبت النار وبيالة حليب بالزنجيل
شجعتني انزل صور طلعات البر الي ماتنسى
تعيش اخوي وتتحفنا ,,
آرق التحاياآ 🙂
ماشاء الله تصويررائع ومجهود تستحق الشكرعليه
سيف الملوك
دامت أيامكم بالراحه والصحه يارب
والله شوقتني برحله بهذا البرد كشته حتى الصور ماشفتها كلها عشان مأشتااق أكثر خليني أعيش جوا
هههههاي
مشكور أخي سيف المللوك على الصور الراائعه تقبل مروري
تقرير رائع
صباحك ورد
ماشاء الله يازين الكشتات
بهالوقت
وحلاتها التخييم وشبة الضوء
عساها دوم هالبسطه
والوناسه
تسلم يدينك على التقرير
الرائع
وسلم سوسو مصورك
المبدع,,,
تستاهل الخمس نجمات