الوسم: النظر

معذور لو جيت أعتذر غيري تعذر وأنعذر
ماخطيت لكن الزمان أخطى وحملني خطاه

حق علي أصبر ومن صبر على شيء صبر
والصبر لو فيه المرارة من ملذات الحياه

على سفينة حبكم ظميان في عرض البحر
هبت عليه العاصفه ثم انتثر ماعون ماه

يبس شفاياه الظما ولا تصبر ما قدر
ولا شرب من البحر زاد الظما على ظماه

بين البدايه والنهايه لا إتجاه ولا مفر
يقبل ويقفي يستدير بدون وجهه وإتجاه

والموت قام إدارج التابوت لأبواب القبر
والموج غاضب والكفن منسوج بخيوط الوفاه

وحارت بعينه دمعته لوجات في صلد الحجر
ذاب الحجر كما يذوب الكحل في عين الفتاه

قطع رجاه من الحياة وبركه حكم القدر
بارك كما يبرك بعير شال حمل ما قواه

ما هو بوده يلفظ أنفاسه ولا حوله بشر
أما صديق بيحه وإلا ولد عم بكاه

وإلا عفيفات يطرن الجيوب من القهر
هذي رمت عنها القناع وذي رمت عنها العباه

على ظهر سفينته يطوي مسافات العمر
مستوحش وحشة نبي الله يونس في دجاه

فجأه وهو ساهي خطف عينه سنا برق ظهر
يبرق على بعد المدا ويضيح في الغبة سناه

وحنت مباكير الرعود وهب نسناس المطر
ريح المطر يطرق وريده والسحب غطت سماه

وأسقاه ربي من سحابه وأنجلى عنه الضجر
وشرب وصدر وأرتوى وأبحر على درب النجاه

وتذكرك يا ظامر السرجوف يا ترف النحر
يا غايته ومناه في دنياه ويا شمعة هواه

أنت السفينة والبحر لا جاك علمي والخبر
أنت الظما والماء بليا شك وبدون إشتباه

البارحة لك وأمس لك واليوم وأيام العمر
الليل ليلك والنهار يشع من خدك ظياه

يابو جديل أشقر مثل الشعاع إذا انتشر
وإلا كما نبع الغدير اللي تحدر للوطاه

يابو حجاج دارته تشبه هلال أتلى الشهر
والخشم سيف جرده حامي السريه من خباه

والعين نجدية ترعرع في محاجرها السحر
لا سجت برموشها جرت فؤادي من عراه

خد كما روض الزهر وإلا قمر خامس عشر
من استلذ بحبته حول على جمر الشفاه

جمر الشفاة اللي تواقد فوق وضاح الثغر
ومبسمك لا وا هني من قبلة و إلا سقاه

ياقوتة في رقدتك كنه مبللها الخمر
خمر الثمان ومن طعم خمر الثمان أدرك مناه

والعنق عنق الجازية لا روحت حل العصر
لا روحت من بطن وادي وامرحت في اللي وراه

وتفاحتين بابلية في بساتين الصدر
الصدر راوي والخصر طاوي كما خصر المهاه

فخذك فخذ بكر تغض الطرف وتحب الستر
والساق تحفه عاج لا مثله ولا في مستواه

وخضاب كفك جنة خضراء على ضفة نهر
وإلا جناح الطير لا فزعه حس قناص رماه

هذي وصوفك يا لطيف الروح يالظبي العفر
وأنت الذي ربي على كل المزايين اصطفاه

وأنت الذي طيفك يسامرني على ضوح القمر
أوسده يمناي وأقلب صفحة الذكرى معاه

وقف ترى عمري بدونك يا بعد عمري هدر
وإلا تعال أودعك وأكتب معك لأهلي وصاه

وصاة مجنون قضى نحبه وهو يهذي شعر
يهذي بحب اللي غرس رمح المحبه في حشاه

يا سيدي حلمك علي وأنا أعتذر عن ما بدر
أصفح عن المذنب ولا تسمع دعايات الوشاه

يا ونتي ونة كسير عظم ظهره ما جبر
و إلا فونة الأسحم اللي طاردينه من عشاه

وأنا حصان طمرته تعجب عيونك لا عثر
يصهل صهيل العز والطراد ما يلحق مداه

ياما عليك أجر ونات العشايا والفجر
وأبكي كما يبكي يتيم يكسر الخاط بكاه