تهب الريح ف اوراق الشجر ويغرد العصفور
……………….وانا تحت الهجير وصمتي احيانا يكون ظلال
وتتكسر خلاخيل الرعد في بارق مغرور
………………..واحس اني تكسرت وبقى في داخلي رجال
أطش بفم هذا الضي حزن وبعض من ديجور
……………….واغمض جفن من تحته سديم واقف مامال
يالارض اخذي سنابل وجهي اللي مانبت فالبور
………………..تعب حتى اساريره غدت بعد الغياب اطلال
خذي بعض الجهات ومن ملامح شاعر مجبور
……………وهو يذبح من عروق الزمن ساعه على الترحال
يالارض البارحه هم الستاير والنجف والدور
…………………وحزن امي وجوعي والفراغ ودفتر دجال
خذت اغلى الدموع من العيون وخاطري مكسور
………………وصوتي ينسكب فوق الورق واحس به لاسال
قبل ذيك المدينه والنعاس وبابها المبتور
…………………تعلمت البداوه والحضاره هي سراب اللال
امانه قولي ل(عليا) قراح الما وطهر النور
………………….. تراني طفل مامل البكا لو ملت الأطفال
طفل مات بهدبها والخدود وشعرها المنثور
………………..قبل يمشي بزهو ويلبس الغتره بدون عقال
طفل كان يتشيطن فالسطوح ويدرج فالسور
………………… ويسرح فالنياق مواعد عشره وهو جمال
يشوف بعين عليا صورته وبثغرها البلور
……………….ويتنفس غلاها ويهذي لامرته بالشال
يالارض الوقت خليته مزيف واحترف لي دور
……………….وانا مالي سوى عليا وحلمي والهوى القتال
فبعض احيان احس اني كذا ..شاعر وله جمهور
……………..واحس اني في بعض احيان اقول اشياء ماتنقال
ورى هذا الكلام يحسب الشاعر بليد شعور
……………….لوى معصم حديثه والقلم بيدينه الاغلال
وخيول تركض بصدري وتجمح ويغشاها عثور
……………….وتعاود ركضها عقب المطيح ويرتجل خيال
يجيني من قبل هالحال ..حال..وحالي المستور
…………….رضيت بقسمتي لو نصف تفاحه على اية حال
يقولون البشر عنتر وهو عنتر يخاف الثور
………………. وانا اقول المخافه وارده في سيرة الابطال!
اجل ..مليت انوخ حيرتي لعتابي المقهور
………………. ومليت آتسلل فالسطور المظلمه واختال
يالارض اخذي يديني مالقيت اللي يمد الشور
……………….وانا تحت الهجير وصمتي احيانا يكون ظلال
=================
دمتم بود ومحبة
تحيات //
MaLaK Al-RoOo7
كلامات هز الوجدان ..
معاني تدمع لها العينان ..
هنيئا لك بقلب ينقل أعذب الألحان ..
لا عدمناك
تقبلي مروري المتواضع
ميلاس
شمعة أمل ..
شكرا لجمال ذائقتك
أنورتوا صفحتي <<