ديوان الامير الشاعر / فهد خالد 2024

شاعر صاحب كلمة قوية ومشاعر جياشة ، مرهف الحس ، صادق الإحساس ساهم بقلمه في أنواع شتى من القصائد الشعرية . وفي هذه المساحة سأعرض بعض الأبيات التي أعجبتني لقصائد مختلفة وأتمنى أن تعجب الجميع .

هذا القمر اقبل

هذا القمر اقبل .. في طلعته ارسل
نور الفرح للكون .. هذا القمر اقبل

في نظرتك بسمه .. اثر القمر رسمه
من خلي المزيون .. في نظرتك بسمه

لوتطلب عيوني .. والله مايردوني
كل الملا يهون .. لوتطلب عيوني

افديك انا بروحي .. يامالك روحي
آمر حبيبي تمون .. افديك انا بروحي

ادعي انا ربي .. تسلم لي ياحبي
وتصون قلبي تصون .. ادعي انا ربي

تاريخ: 1993
كلمات: فهد بن خالد
الحان: نبيل شعيل

احرق هموم القلب وانثر رماده
دامه غدى شوفة حبيبي هقاوي

خلك قبل تجفاه وصلك مناته
واليوم منتب ياريش العين ناوي

عزي لمنهو في ضيع مراده
يطرد سراب لاح فآرض خلاوي

وانا تعبت ولا حصلي سعاده
بجبر على فرقاك قلب شقاوي

لو مالقى في البعد عنك هناته
البعد للمجروح طب يداوي

وادعتني .. فارقتني .. قالت لا تهل الدموع
وأنا منك .. وانت مني .. انتظر يوم الرجوع
لا اتشكى لو تعبت وإلا عنيت
قلبي يسمع ياحبيبي لو شكيت

قلت لو طال الصبر .. وطال بعدك أو قصر
بنتظر أحلى خبر .. رجعتك يا أغلى حبيب

لا توادع باللقا .. ما أنسى حبك لا تهقا
حتى لو طال الشقا .. وعني طولت المغيب

كلمات: فهد بن خالد
الحان: طلال مداح
مقام: نهاوند

اطفال

كل القلوب اطفال … ما به حكي ينقال ..
عن ذيك القــــلوب ..
اللي تحب و تذوب ..
تنجرح بعد الجروح تحب … ضاع الصدق و الكذب ..

—

ليه القلوب ضعاف … مثل الورق شفاف ..
بحر و ناخذها بعيد ..
و نصدق الكذبه اكيد ..
رغم انها بالامس جرحها الكـلام ..
رغم انها بالامس عاندها الظلام ..

—

الحب مثل دره في بحر … و الموج يبعدنا خطر ..
ما نوصل الدره بعيد ..
ما نوصل الدره اكيد ..
و اه يا قلبي انا ..
اه يا قلب العـنا ..
تنجرح و بعد الجروح تحب … ضاع الصدق و الكذب ..

مثل الضرير .. صبحه غدا ليل و سواد
جرح الضمير .. أقسى من الفرقا
عمري اللي راح .. دمعه على الماضي البعيد
هذي الجراح .. تكتب من دموعي قصيد
تكتب و ملتها الحروف ابعد عن عيوني بشوف
هيا الحياة فيها جديد

معذوره الخطوه .. لو تعشق دروب الجراح
معذوره البسمه .. لو تنسى الفرح اللي راح
دمعه ألم هلت على وقتي العنيد .. غير الندم مالي ب هالدنيا عضيد
يرسم من جروحي طيوف .. يسهر معي يمكن يشوف
هيا الحياة فيها جديد

ما أمنعك كان الفراق هو غايتك
وشلي أنا غير العذاب في دنيتك
بودعك وهذي الجروح .. اللي تبي .. اللي تبي
الله معك جرحي أنا .. ماهو بيدي .. ماهو بيدي
وأكتب من احساسي حروف .. ابعد عن عيوني بشوف
هيا الحياة فيها جديد

تاريخ: 1993
كلمات: فهد بن خالد
الحان: طلال مداح

الله يجيبك
يامبعد حيل عني .. ليتك قريب
خل الليالي سعادة .. وينك تعال
العمـر لحظة
لا لا تطول عليا .. لا لا تغيب
البعد والله ماأطيقه .. ماأحلى الوصال
لا شفت زولك
كن الليالي تغني .. جاك الحبيب
أشرق بوجهك عليا .. كافي دلال
حسنك فتني
يسرق عيوني وقلبي .. سحرك غريب
والشعر ليل تموج .. وجفن هـلال
يا نور عيني
كل الجروح القديمة .. لأجلك تطيب
لامن تبسم حجاجك .. مابه محال

كلمات: فهد بن خالد
الحان: فلكلور قديم

يا حياه المعنى شوق قلبي تغنى
للهوى ألف معنى شال بالشوق شيله

جرحك إلي براني بالهوى ما كفاني
ليه خلي جفاني مات بالقلب حيله

حبك إلي في قلبي ليه أداري واخبي
حبك أنتا وحبي للهوى قلت ويله

نظره من عيونك تروي إلي يبونك
قلت ربي يصونك كل يوم وليله

كانـك على ذبـح الوفى فينـي قــــاوي … تذبـح خـفـوق اللي يحبـك ولا تــــــاب
واللي بقـى مـن وقتنــا مـا يســـــاوي … لحظــة نعانيـها مـن البعــد أغــــراب

لا يا نجــوم الليـــل ماني بهـــــــــاوي … فرقـى منـاة الروح ولو طالت أسباب
يا ناصحـيـن القلـب ما لــه مـــــداوي … غيـر الحبيــب اللي لـه القلب طـــلاب

احبــــــــــك موت في غيابك و اذا شفتك احبـك زود
احبك في ابتسام الوقت و احبك في جفا ايـامي
اشوف النـــــــــــاس لى شفتك اسامي ما لهن وجود
و لا من غبت عن عيني اشوفـــــك طيـف قدامي

ابرحل في سما افكاري و اسكن في العيون السود
ابي اسكن بها لحظة و اروي نـــــــــاظر ظامـي
و انسى ما مضى لاجــــــــلك و بنده عمري المفقود
و اقول العمر لك وحدك و بانسى جرحي الدامي

و بجمع ما بقى من وقت و بصـــــرخ يالهنا موعود
لقيت اللي تمنيته لقيــــــــــتك يا هوى احلامي
و اضمك حيل لا تبعد اخاف ان الـــــــــــزمان يعود
و باخذ عمري الغلا و تـــــــرجع ماضي الامي