السلام عليكم ورحمة الله وبركاته
***
***
***
مابين ابو رمش على الخد خادر=وشهب الوجيه اللي تقل تطلبك دين
يلعب بي الهاجس ولا زلت صابر=حتى تصير العين في خاطري غين
(شاعر).. ولكن عندي الفكر (شاغر)=أسرح مع الهوجاس.. والاسئلة وين
لكن ترى ماسهرت بيض المحاجر=إلا بفكر يشبه لجيش حطين
الشعر يصبح بعض الأحيان فاجر = ينسج بعقلك من هجوس المجانين
الشعر يدني بك لبعض المخاطر=وأحيان يدني بك لعرش السلاطين
وانا لو إني ما أحبس الخواطر=يموج بي فكري على الزين والشين
انا ولد آدم … ولي ند كافر=كيده بدمي جاري بالشرايين
حلف ليغويني لو إني مكابر=مادامني أجوف ومخلوق من طين
إما أصير لرب الألباب شاكر=وإلا أبليس .. ببعض الأفكار يغوين
فياللي تمنى إنك تصير.. شاعر=الشعر سيف له نصاب وحدين
إن كان ماعندك من العقل زاجر=تراك تلعب في حدود السكاكين
تاجر بلا ميزان ماهو بتاجر=والشاعر الناجح.. بعقله ميازين
إما تبوح بطيبات النوادر=وإلا ترا بالصمت عبره وتمكين
إما قصيد به تطيب المحابر=وإلا إترك الحبر لهل العلم والدين
إما قصيد يستحق المنابر=وإلا نخليها لوعظ المصلين
الفرق ماهو بالجمر والمباخر=الفرق.. جود العود يأهل الدياوين
خل المظاهر وإلتفت للمخابر=ومن جمع الثنتين زين على زين
بالحق بادر .. وبالخطأ لا تبادر=الصمت فن و يتقنونه قليلين
الصادر إحذر لا يفوق المصادر=الله عطاك لسان وعينين وإذنين
راقب زمانك بين ماضي وحاضر=يعطيك درسه بين عبره وتلقين
وأنا مع الآيات .. والكون ساهر=إبداع خلق .. وعفو رب .. وقوانين
الأرض يسقيها من الله ماطرياما تصير الارض مثل البساتين
وإن غاب ماها يصبح الكون غابر=تجف الارض ويصبح الخلق وجلين
ثم يستغيثون اللي على الغوث قادر=من لامهم.. لأستسقوا الله ذليلين
يدعون يامنزل تبارك وغافر=أسق البلاد .. أسق العباد المقلين
جفاف الأرض .. لطالب الغوث عاذر=والذل لله رفعة بالموازين
مار البلا لاصار لك نصف هاجر=هذا الجفاف اللي يذل العزيزين
مابين أبو رمش على الخد خادر=وشهب الوجيه.. وجملة بين قوسين
(جفاف الارض ولا جفاف المشاعر=لو تستغيث لخاطرك صرت مسكين)
الشاعرفالح ناهي الشمري
والحمد لله رب العالمين
تحيااااااااااتي لك
عطرتي الابيات
تحياتي