أيام ماكنت بعيونك لحالي
أيام ماصارت ولا مثلها يصير
عيت تفارق في غيابك خيالي
أيام كانت في تواصيفها غير
يوم ( ….. ) جاب راس الشمالي
تاخذني الذكرى على الدرب وأسير
وأحن لأيام الغرام الخوالي
واراجع الماضي وذيك المشاوير
وأحسك من الشوق واقف قبالي
يا أغلى العمر مال الخطايا معاذير
مابي بدالك لو تدور بدالي
وإن جاء مكانك غيرك بيوم ( يا طير )
ماكل غالي يسكن الروح غالي
أو جاك مني يالغلا بيوم تقصير
بيض الليالي غير سود الليالي
بعض الخطا يحتاج مني لتبرير
لو العذر فيني من الذنب خالي
غاليك ضايق للسماء وده يطير
ضاقت عليه الأرض والموج عالي
دارت به الدنيا ولا عاده بخير
غاليك ضايق يابعد كل غالي
تدري وش اللي دمر القلب تدمير
إنك لغيري صرت وأنت حلالي
كل العيون اتطيح من عيني إلا أنت
إليا ذكرتك هزني طاري الشوق
وين أنت ياللي عالمشاعر تسلطنت
واشغلتني عن كل كائن ومخلوق
من قبل أعرفك مااعرف وين انا كنت
ولا كنت أعرف ان الهوى قمة العوق
محتاج لك لوتسمح شوي لاهنت
مليت المح لك من الضيق مخنوق
مليت أسولف عن تجافيك وايقنت
إن الزمن لاحس عنده ولا ذوق
رابع سنة مرت وللحين ما بنت
لا ديمتك ديمه ولا بروقك بروق
ضاع العمر ياللي بروحي تمكنت
وأحنا نردد كل مطرود ملحوق
إن كان ردت للمراسيل هونت
لأن المراسيل إنتهت مالها سوق
وإن كان ردت للأمل خير عينت
إن أشهد إني جيت للقاع من فوق
البارحة لا زان حظي ولا زنت
كن الحزن طوق على ناظري طوق
وين إنت ياللي في عذابي تفننت
بهديك بيت ما على غيرك يلوق
بهديك بيتن كم سنة فيه هيجنت
بيتن يساوي ألف معنى وطاروق
ليت الخلايق تنقلب كلها إنت
واصير اشوفك كل ماشفت مخلوق
وقفة عتاب وشرهة ملوك لملوك
وجبال لا صار اللعب حيل حامي
مانرقص العرضه على نغمة الروك
ولا نرمي الاهداف من غير رامي
ونشلع على حد السمى شلعة (الهوك)
نكسر شموخ الغيم ويطيح دامي
والقمة اللي تجمع الورد والشوك
ماكل عصامي لاوصلها عصامي
يابو شبيب اسمع كلامي وانا اخوك
وخل الكلام الي يجنب كلامي
ماهو لسواد عيونك ان كان حبوك
شوف (المرامي) وانت تعرف مرامي
أشوفهم صوبي على الضيق حدوك
هم مادروا بالضيق إنك حزامي؟
وإنك عضيدي لا طغى كل مملوك
وإن احترامك بالحياه إحترامي
رح قلهم ان كان فيني تحدوك
ماصدرت مني قراح الظوامي
وإن كانهم في وجه الأيام حطوك
ترى الأسامي ماتجر الأسامي
رحلة شقى والدرب مفروش بالشوك
والليل مايشبه ظلامه ظلامي
تخصصي ألعب على كل صعلوك
سامي..ولو كان الهدف غير سامي
واللي يعزم الكايد ويرخي البوك
شيصير يعني لو ذبح كم شامي
والجادل اللي بالشعر تعطي صكوك
راحت عليها ولا تثير اهتمامي
خلهم علي وافتح لي الدرب ارجوك
وبلغ لي (المقهى الجنوبي) سلامي
أخوان.. لكن بالصحافه إذا جوك
طلع عمامك عن سوالف عمامي
رح قلهم والبيت مملي ومسبوك
ولى زمن جاسم وفيصل وسامي
ولا عاد غير ديوك وتناطح ديوك
بس الصور من عقب ذيك الأسامي
وكانه مخططهم متوبك ومحبوك
عمر (الحرامي) مايبوق (الحرامي)
القصد واضح والهدف صار مشروك
والضرب بين أثنين واللعب حامي
إما افوز وقالت الناس.. مبروك
وإلا وغلاتك ماتشوف انهزامي
دام الصدر يا حضرة الضيق ما ضاق
والله لتبطي ما تزلزل كياني
ودام الليالي قلبها ينبض اشواق
خله يموت الهم بين المحاني
ليه اتضايق كل ما لاح براق
دام الزمان اللي اعيشه زماني
وليه اتليعن يوم انا كلي أخلاق
لو باع واحد ألف واحد شراني
الله عطاني بالصبر صدر الآفاق
وباخذ من الله كثر ما الله عطاني
لو يخلطون بغيبتي كل الأوراق
برجع واحوس أوراقهم في ثواني
يا صاحبي ما هي سواليف عشاق
حتي تموت بصدر أهلها الأماني
أنا بشر لي قلب وأحس واشتاق
واشقى وأعاني مثل ما أنت تعاني
يعني شيصير بيوم لو قالوا: إفراق
أصلا من أول عنك قلبي حداني
«أكذب عليك إن قلت ماني بمشتاق»
شطر قديم العام يمك خذاني
أيام ما شمس الغلا دوم بإشراق
أيام حبك عن عيوبك عماني
أيام قلبك بس لو تدري اشباق؟
قلب خلق لك من جروحه معاني
قلب موقفني عشانك على ساق
يخاف اقصر في غلاتك ثواني
قلب صبر في وضع لا يمكن يطاق
يا ما نهيته عن هواك وعطاني
واليوم أشوف الشوق للبعد سباق
يمكن نسيت الحب والا نساني
الله وكيلك مسأله كلها أرزاق
طالع مكان وين وطالع مكاني
بكره إذا «ما التفت الساق بالساق»
يبي يكون لوضعنا حال ثاني
ودام الصدر يا حضرة الضيق ما ضاق
لا أنت ولا غيرك بزلزل كياني
[FONT=Tahoma][SIZE=5][COLOR=red]
من تجربة حبك وصلت لقناعه…
إذا بغيت انسان يغليك خونه…
يشتاق لك(اربع وعشرين ساعه…
دامك تخونه شرط تاخذعيونه…
اقرب طريقة للوصال القطاعه…
جرب تغيب أيام وطالع جنونه…
كل ماطلبته قال سمع وطاعه…
يبيك لوكل الخلايق يبونه…
وإذا عطيته قلبك بصدق باعه…
يحسبك له ظامي وميت بدونه…
لان الغلا في شرع مثله بضاعه …
يبيع لو شاف البشر يشترونه …
شفت الغلا ضايع وقمة ضياعه…
اني عطيته ناس مايعرفونه…
حزينه ليه يالجهرا علامك يابعد عمري؟؟
علامه جوك الليله كئيب ومظلم بعيني ..؟
أنا جيتك وأنا مثلك حزين وضايق صدري
أبشكي عن همومي وابي صدرك يواسيني ..
إلا مني زعلت وضقت أنا والله من عذري
ترى ماجيت لك ألا وانا ادري ماتخذليني ..
"غليتك من غلا منهو سكن بك" والغلا يسري
مثل ماجيت لك ساري غلاهم ساري فيني ..
ألا يالجهرا قولي وينه اللي شاغل فكري؟؟
هذاك اللي على شانه غديتي كل عناويني ..
هذاك الحب من قبله على بالي ولا يطري
ومن عقبه ملكني بالغرام ودمر سنيني ..
تركني وماعرف من عقبه شاللي غدا يجري!!
أحس اني فقدته أو عطيته شخص بإيديني ..
ترك لي يوم فرقاه رساله قبل لايسري
قبل هاليوم بأسبوعين يومنه يلاقيني ..
وضحك لي يافديت الضحكه اللي نورت عمري
ووعدني مايخليني وقال إنه يب يجيني ..
وراح وتتبعه عيني ألا مقواك ياصبري
عسى ماهي بدايات النهاية بينه وبيني ..
ألا يايوم هالجمعه إبد ماانت على خبري
كئيب "وشوفة الجهرا أبد ماعاد تغريني" ..
أحس بعبرة تملا عيوني ودها تجري
على خدي وأحس الكون ضايق مايكفيني ..
تصافق بي هواجيسي أبيع بحسرتي وأشري
غديت أدور بالجهرا ولا أدري أنا ويني ..
سرحت وراحت أفكاري تشتتني وأنا مدري
صحيت ولا وعيت إلا وصوت به يعزيني ..
ترى بدري على علوم السعادة والفرح بدري
مدامه غايب عني أبد ماشي يغنيني ..
أمانة ليه يالجهرا حزينة يابعد عمري
وأذا حزنك على الغالي طلبتك لاتخليني
قصيدة ( جرح الأيام )
وصلتها للموت ياجرح الأيام
ولا عاد باقي في بقاياك باقي
وبددت في دنيا الوصل كل الأحلام
بين الفراق وبين هم التلاقي
ياما صبرت وعذري الوعد قدام
وأحسب تعاونني على الدرب ساقي
وأثر الهقاوي كلها أوهام بأوهام
ما جا زماني مثل ما كنت هاقي
يا أول أحاسيس الغلا والغلا هام
قلي متى وجهك يحرر وثاقي
قلي متى تنطق وأنا آشوفك أصنام
ماهمها ضيقي وزود احتراقي
حظي خذلني فيك لو طاح ماقام
مثل العيون إن خونت بالسواقي
تجري تواريخ العمر عكس الأرقام
ويبقى العمر بين التواريخ شاقي
وأنا على هالحال قلبي من العام
بمكابد الدنيا ذبحت اشتياقي
كل شي توقعته من جروح وآلام
إلا إنك إنت بيوم تطلب فراقي
ثمنت وصلك يوم جربت فرقاك – مرة خسرتك مابي اخسرك ثاني
لا والذي خلاني بيوم اهواك – ماغاب زولك عن عيوني ثواني
هذا انت لاجيت ابلقاك القاك – اقصاك لو تبعد سكنت المحاني
عودت قلبي دايم ان يتبع رضاك – مذكر طلبته فيك شي وعصاني
ماشفتني يوم اكتبك واتهجاك – ماشفتني وشلون اجيب المعاني
شلون اعيش العمر بعيون ذكراك – لحظة بلحظة بين شوق واماني
ماشفتني يوم اتأمل سماياك – وشلون اكابر لجل وصفك واعاني
ياقبلت عيون الغلا وين دنياك – والله لجيلك جان ربي حماني
ماشفت للبسمة تعابير لولاك – وماكان للفرح بحياتي مواني
لولا الامل ماكنت للحين وياك – ولولا المحبة ماعرفنا نعاني
دامك تعيش بداخلي كيف بنساك – هذا السؤال وحط نفسك مكاني
شعوره حسه صج ضايع بلياك – لا الوقت وقتي ولا زماني زماني
عود علي يا روحي منا اتمناك – من جور بعدك جاني اللي كفاني
الله عطاني محبتك يوم خلاك – تسكن خفوقي واشهد انه عطاني
جيتك خفوق(ن) ماراح امليه برجواك – لعيون وصلك ذلني وابتلاني
جيتك من الحرمان لعيون ذكراك – ودي اعرف لوين حبك خذاني
جيتك ابيك واعشقك واترجاك – مرة خسرتك مابي اخسرك ثاني
بسمعك نص جديد كتبته
نص يدور بخاطري فيك من عام
والبارحه يوم أستوى الكيف جبته
لعيونك اللي تسهر الناس وتنام
البارحة طيفك من ايده سحبته
ورحت اتمشى فيه يم ذيك الأيام
أيام ماعمري من ايدك شربته
أيام راحت مثلها مثل الاحلام
كان الغلا يزهر بك أحساس نبته
كانت سواليفك سهر ليل وانغام
كنت العمر بعيون منهو عجبته
كل مامشى قدام يلقاك قدام
مثل العطر في روح روحي سكبته
للحين احسه داخل أنفاسي أنسام
كان القصيد يجود كل ماطلبته
وشلون يبخل وانت لحروفه إلهام ؟
كل شي غيرك من حياتي شطبته
ماكنت اشوف إلا انت في كل الانام
ياللي بغيابك كل فرحي حطبته
وشبيته بجرح الليالي والأوهام
ماقلت لي اي ذنب فيك ارتكبته ؟
حتى تخليني للأشواق منضام
إلا فراقك صاحبي ماحسبته
كان الفراق أشبه بتحطم الأحلام
ماكان دورك بس أشوفك لعبته
ومن بعدها لا طاب حظي ولا قام
راح العمر وياك واللي قضبته
باقي جروح وزحمة هموم وآلام
( في غيبتي )
بين السنين وبين عين الشقا دين
لوني دريت بحالته ما درابي
ضايق وأدور في عيون البشر عين
تفهم معاناتي وتقرا كتابي
في طيحتي كثرت علي السكاكين
باع الزمن في طيحتي وأشترابي
عيت تجي وياي بالعسر واللين
المسألة فاقت تصور حسابي
ياصاحبي مال المفارق عناوين
هذا عذابي كان همك عذابي
في غيبتي نامت عيون المساكين
مدري سريت الجرح وإلا سرابي
في غيبتي قلبت جميع الموازين
حتى ثيابي كنها مو ثيابي
في غيبتي راحت عيونك علي وين
ياللي خذيت من الغلا كل مابي
ماأنت هذاك اللي أعرفه من سنين
إبذمتك منهو عرفت بغيابي ؟
