كلبوها
ولو إني داري انكم مادخلتوا الموضوع لعيونولد الحفر..لكن كله على شان طاري
فراوله.بس مومهم.
شباب بنات هذي القصه تجدونها على ثلاث أجزاء . يعني اللي يتعب من القراية
يعرف وين وقف.
يعني حاط لكم استراحه ومحطه بانزين بس المشكله مافي ديزل
بأرسلها على ثلاث دفعات لأنها طويلة 
<< مدخل حصري لولد الحفر>>
قالوا تحبه ؟ قلت: بالحيل بالحيل * قالوا توده قلت: ما اود غيره .
قالوا تريده ؟ قلت: بالحيل بالحيل* قالوا تعزه قلت : آه بالحيل بالحيل .
قالوا تتمناه؟ قلت: الله ياخذكم لكم ساعة طايحين فيني أسئلة توكلوا على الله عشان
أبدأ القصة .
القووووووووووصه حدر الشخطه كالعاده
_________________________
( الفصل الأول )
لحظات ماقبل ماقبل الحسم
كان ياماكان ذات مساء عاصمي جميل وكنت في طريقي متجها الى وسط الرياض
بالتحديد ( سوق عتيقه ) حق الخضار والفواكه .
وكان معي صديقي وحبيبي كوماندز والعلاقة بيني وبين هذا الصديق تمتد لبطون
التاريخ .
وذلك قبل 22 سنه أول ما انولدنا في اسبوع واحد .
وكان يسولف لي عن مغامراته في سوق ( الغزل )
ومواعيده الغراميه مع ( بنات الهوى )
وانا ( فاغر فاي ) ورايح وطي ورايح كشنه بالكشري مع سواليفه.
تصدق ياولد الحفر أمس ( دلول )أهدتني دب مكتوب عليه أحبك يا عذابي .
تصدق ياولد الحفر هذا البوك اللي في يدي مهديته لي ( تغريد )
الربوع اللي طاف.
تصدق بالله ياولد الحفر( هدى ) سددت فاتورتي حقت الشهرين اللي راحوا وفيها
ألفين ريال.
وانا قاعد أستمع له و ( مبلم ) لدرجة اني قطعت اشارتين حمراوتين بس الله سلم
ترن . ترن . دق جوالكوماندز ناظره وقال: يلعن أبو اللزقات ياهووووه .
شف ياولد الحفر طالعت شاشة الجوال ومكتوب فيها: النشبه يتصل بك
قلت من هالنشبه قال: هذي ابتسام الله ياشيخ ياخذها
أنواع الازعاج كل يوم عشرين مسج
وستطعش ستين اتصال سميتها نشبه ولا قمت أرد عليها .
قلت في نفسي : إيه بلا والله من العز اللي انت فيه.
يحق لك تطنش مو زيي منقطع.
شاف كوماندز بقاله قال وقف وقف وش أجيب لك معي قلت : أي شيء .
نزل كوماندز البقالة وجواله عندي بالسيارة.
قعدت أهوجس الحين أنا أزين من كوماندز بألف مرة وشعري أنعم منه وأرتب
وسيارتي أحلى من سيارته ومع هذا البنات عنده وانا ( متلحط )
بس بربع الاستراحه التماسيح.
إيييييييييه الله يا أم كلثوم صدقتي يوم غنيتي من ألحان السنباطي وقلتي: الحظ لا منه
استقعد وش يفكك منه ياوليدي.
ورجاءا لا أحد يسألني عن هالأغنيه لاني سألت السنباطي نفسه عنها ولا عرفها
ترن . ترن . قطع هواجيسي اتصال جوال كوماندز .
ناظرت الجوال وأثر النشبه يتصل بك.
إنبرش علي ابليس انبراش مايسويه المنتشري وقال:
رد . رد واسمع الصوت العسل انت في حياتك ماسمعت الا صوت حرمتين.
أمك لا قامت تدعي عليك. وشغالتكم لا قالت: جيب شماغ انته انا فيه يكوي.
شلت الجوال ظغطت على السماعه الخضراء
وقلت بصوت رومانسي حنوووون عاطفي حااد.
ألوووووووووووووه واحتريت الرد العسل والصوت الدافيء واذا بصوت أجش مكر
مفر مقبل مدبر معا يخترق طبلتي.
وينك فيه يابن الحرام تاركني بالمستشفى ساعتين وتدوج في هالشوارع
من الروعه سكرت السماعه وذبيت الجوال وقلت الله ياخذك يالفقاش ياكوماندز أجل
أبوك خليته ابتسام.
ركب كوماندز ومعه بيبسي يشربه وعطاني براية خضراء ! قلت: خير ان شالله
قال: انت مو تقول جب لي أي شيء .
قلت: أقول ترى ابتسام تحتريك بالمستشفى يالنصاب ( دحجني )
بنظره حاقده وخذ جواله.
وجلس ساكت وهو عيونه حمراء وبحر أمواج خدوده قاعده تتلاطم من قوة التهزيئه
وفجأة إذا بنا على أعتاب السوق الجميل سوق عتيقة المركزي.
V
V
V
( الفصل الثاني )
<< لحظات ماقبل الحسم >>
دخلنا سوق عتيقه شريت كم حزمة خس على جرجير مع كراث
وبطاطس على كوسه .
وطماط وكرتون بردقان مصري وتفاح أحمر وعنب
احمر عشان احس اني مودرن وولد نعمه.
وطبعا مانسيت الخيار لأني من النوع اللي يحب المكرووونه موت ولا تسألوني وش
دخل المكرونه بالخيار لأني باختصار: أكره الحمبص
وهنا اشتدت وتيرة الاحداث .
قاعد أحاسب راعي البسطه فمر من جنبي شبح هالشبح ياجماعة الخير
( لحس ) مخي.
خلاني بدون شعور أطلق تصفيره من شفايفي واقول: أويل حالي ويلاه .. يووووووه
دققت النظروأثاريها بنت عليها عباية كتف مخصرة
ياشيخ ألعن من خصر حرمة بابآي
والطرحه يلعب بها الهواء والنقاب ياقلبي على النقاب يذبحك ذبح الشاة بدون سكين
والعيون كل الكحل اللي بمحلات أبوريالين مكبوب فيها.
والجوال (معلق) بالصدر بحركة سرياليه .
هذا غير الزخارف اللي باالأكمام والدناديش اللي في جوانب العباة.
طبعا خلاف العطر اللي ريحته (شقت) خشمي وطلعت من بؤبؤي.
أخوكم في الله ( بلم وفيوزاته ضربت )
وصرت زي ماقال الشاعر في كتاب النصوص :
مرحوم يا ضب على الخط مدعوس ** له سبعة أيام ومحدن درى به
قعدت أتمقل فيها أبحلق أناظرمتعجب وفجأة سددت لي نظره و طاحت عينها بعيني
ومن لهفة الموقف طاح أخوكم على بسطة الخضار حقت البياع .
حسيت أثناء سقوطي بضحكة بانت في عيونها العذاب .
شالنيكوماندزوالبياع وهم (يسموون)علي وقال لي كوماندز بخبث ابليسي ماكر:
ولد الحفر الغزال يلزمك أو تتركه لحبيبك كوماندز؟
نقزت وقلت : كوماندز بلاش تكفى حكي أهل العصابات ترى تخوفني وش تقصد ؟
قال لا تستهبل معي البنت عينها عليك من يوم دخلت السوق
يعني ياتروح تظبط أمورك معها.
أو اتركها للي يفهمون هالشغلات وطق على صدره
نقزت ببراءة تثير الشفقة وقلت: لا لأ في ذمتك وفي صلاة امك وابوك الله يفضخ
عيونك ان ناظرتها أنت عندك تغريد وهدى وغيرهم.
خل هذي لي أنا ( حالها ) قبلك ضحك وقال بمكر قروي:
يهنيك فيها ياشيخ لعيونك تركناها.
بيني وبينكم ترددت لأني ماعمري عشت كذا موقف قعد يوسوس لي بليس عن يميني
وكوماندز عن يساري وهو يقول:
تعجز تروض مهرة جت تتحرش فيك.
حسيت انه استفزني بيني وبينكم والكلام للجميع رحت طاق صدري وقلت:
أنا ولد ابوي إرس ياترس واعتدل ياملف اليوم يومي وانا اخو شقحاء
طلعت قرطاسة علك ابونعناع غندور وكتبت الرقم وتحته اسم: لؤي 
ولأول مرة في حياتي العمليه قربت من البنت ورميت الرقم وجيتك أركض للسيارة
وكوماندز وراي ولا تسألوني عن الجرجير وكرتون البطاطس لأني نسيت اسمي وقتها
مر يومين على القصه هذي ويأست من اتصال ( الغزال ) اللي ماطلع من بالي أبد .
أيقنت أن البنت تركت الرقم بالأرض وطنشت.
وفي تمام الثالثة فجرا ترن . ترن .
(طبعا نغمة موسيقيه بس مقدر أكتبها قلت : ترن ترن وافهموا )
رقم غريب كان واضح أنه رقم ( سوا ) .قلت: ألو جاني صوت حنون حنون خلى
جوالي (يموع) في يدي.
ألووووووه هاااااي الأخ لؤي ؟ قلت: لا ! إلا صح أنا لؤي نعم ؟
قالت: وش هالحركات ؟ قلت : أي حركات مافهمت ؟ —> عمري يالبريء
قالت: الترقيم اللي بالسوق أو تسوي ناسي ؟ قلت : آها ذكرت بس والله آسف .
قالت:وين اصرف آسف هذي فيه قلت بحنية مستفيدها من كوماندز الداشر:
والله آسف ليت تعذريني اختي عيونك وفتنتها الله يعلم خلتني أسوي شيء
أول مرة اسويه بحياتي.
(( بيني وبينكم حسيت أن البنت تسلكت واستانست بالمدحه.رحت مزود العيار ))
قلت: حشا مو عيون هذيك هذيك أسلحة دمار شامل راح بوش
يدورهم عند صدام وهم بعيونك.
صدقيني أول ماشفتك قلت مستحيل تكون هذي انسانه مثلنا.
هذي أكيد لوحة من لوحات بيكاسو طاحت منه وهو يتمشى في عتيقة.
(( البنت داخت وبديت أحس ان صوتها قام يرعد واخوكم في فن التسليك استاد ))
قامت تضحك بدلع وقالت : الله اسلوبك حيل حييل حيييل يجنن دمك بالمرة خفيف .
رحت مزود العيار مرة وحده وقلت: فيه نصراوي مات ابوه قال كله من الحكم
ضحكت بصوت عالي:ههههههههههههااي الله يرجك يا لؤي ..
قلت: هاااه من لؤي ؟ قالت: ههههههههههههاا ههههه هذي بعد مرة حلوة.
من غيرك قاعدة أكلم الله يرجك لؤي.
رحت مصرفها قلت : ايه استهبل معك
(( بغيت اجيب العيد لأني أول مرة اسمع بلؤي ))
قلت: بليز بونسواغ وش اسمك ماتشرفت فيه؟
—> مسوي مثقف وهو أدلخ فرنسي
جاوبتني بدلع تبطي حليمة بولند تجي ربعه.
إممممممم ماراح أقولك بس أول حرف ( ف ) ؟
قلت بدلاخه متأثرة بموسم التمور : فا . فافافافا .فيمتو سيف؟
قامت تضحك بقوة وتقول الله حسيبك يالؤي ماقد ضحكت
هالضحك قبل اليوم وااااو وناسه انت .
اوكي را ح اقولك معك ((فراوله)) يا لؤي . اسمي ((فراوله)) .
المهم راحت ساعه وربع غزل ودلع وتنكيت قمنا نسولف
سواليف لين أقام الفجر قالت وهي مستعجله.
لؤي عن اذنك الوالد قام يصلي واخاف يشوفني أكلم.
بعدين أحاكيك أوكي؟ باي حياتي .
طوط طوط .
يالربع هي قالت حياتي ولا ماقالت أخوكم في الله ( غاص )
في مرقده ثم قام ثم انسدح.
خذت الجوال دقيت على كوماندز: سألته الواحد لا كلم بنت
وحس برعشة ووده يحضن دولابه وش اسم هالحاله ؟
قال بخبث ومسوي فاهم: ههههههه ههههههه .
صرت زميل مهنة ياولد الحفر والله وحبيت.
قمت مبسوط وصاير مهلبية بالبشمل تركت كوماندزعلى الخط ماقلت مع السلامه.
رحت المراية(سرحت ) قذلتي اللي متطاق بسببها أنا وأبوي لي شهرين .
قمت أبخبخ على روحي من كل عطر اشوفه قدامي.
حسيت نفسي انسان ثاني انسان غريب رومانسي صرت اسبح يوميا
مو زي أول أسبح بس بالأعياد
المهم استمرت المكالمات بيني وبين فراوله تدق دقة وحده وتفصل ثم أرجع أكلمها .
صح ان الفاتورة ( تمحطني ) بس كله لعيون الغلا يهون
صرت شخص ثاني رومانسي عاطفي صرت ما أتحمل اشوف الدجاجة تنذبح قدامي
مع اني أول اذبح الخرفان بالعيد
اصحى من النوم أغني : كتمت الحب وأثر الحب ماينفع له الكتمان.
أمشي وأدندن : ياناس حبيت واحد والمحبه صعيبه .
في السيارة : سيدي قوم ماخبرت اللي يحب يهتني بنووم سيدي قووم .
صرت من الناس اللي يؤمنون بالحب من أول آلو .
صاركوماندز يحسدني وانا اللي كنت أحسده
مسج يروح مسج يجي واستمرينا مده على هالحال
v
v
v
v
( الفصل الثالث )
<< لحظات الحسم >>
تعمقت العلاقة الهاتفيه بين لؤي اللي هو أنا وبين فراوله .
صار بيننا عيش وملح وحب وغزل والبنت عليها أسلوب
مو سهل يعني بالعربي الفضيخ:تعطيك مثلا:
كنت مرة أكلمها عن واحد من العيال صار له حادث وتبرعت له أنا بدم .
وسألتها:فراوله على طاري الدم وش فصيلة دمك انتي ؟
قالت: فصيلة دمي لؤي موجب قلت: هاه يعني وشو.
قالت: دمي غلاي ظماي كله لؤي انت دمي انت كلي ياحبيبي.
واخوكم لاتسألون عنه وقتها ( انفرش ) في سريره وجته سكتة عاطفيه
ماصحيت الا على وقع سطل موية بوجهي من الوالد وهو يقول: قم صل وانت هنا
كنك ثور ماعليه قلادة.
والثيران في قاموس الوالد نوعين
واحد حبوب وهادي قدروا يلبسونه قلادة بس يظل ثور.
والثاني: من زود هباله وثوارته ومطامره ماقدروا يمسكونه
ويلبسونه قلادة وانا أتبع هالمدرسه.
في نظر سماحة الوالد المهم خلونا الحين من سيرة الشايب ونرجع لموضوع الحبايب
مرة من المراريت وأنا منسدح على جنب وأكلم الغلا فراوله قلت:
فرواله أبي أشوفك أبي أشبع عيوني بشوفتك لأني ما رويت من شوفة ذاك اليوم.
قالت: أخاف مايعجبك شكلي وتقطع العلاقه .
قلت: لأ وانا ولد أبوي أنا شفت عيونك ومستحيل ذيك العيون تكون على شينه.
وبالأخير لو كنتي شينه صدقيني أنتي توأم الروح لو فارقتك روحي تروح.
انتي سكنتي قلبي من الوريد الأيمن الى البطين الأيسر ولا يهوون الشريان الأورطي
فرواله ارحمي عاشق على وشك الموت فراوله الشوق ظالم
لاتفجعين أمي في ولدها.
قالت: والله عليك أسلوب وكلام مدري من وين تجيبه يخلي الوحده تذوب غصب .
قلت : هالكلام جبته من مشاعري فراوله قلبي اللي نطق مو لساني
قالت: بس بس كسرت قلبي والله حتى انا نفسي أشوفك ثانيه ولهت موت عليك.
قلت خلاص الوعد متى ووين ؟
قالت: اممممم بكرة المغرب بنفس المكان عتيقة.
قلت أووكي باي عشان أبدأ أتجهز للموعد
اللي سيكون خالدا في براثن التاريخ البشري.
من بكرة رحت مظبط الشعر طاق الجنز مسوي سكسوكة
لأن فرواله تقول أحب الرجال بسكسوكة
رحت لأخوي الكبير اللي توه مطلع من الوكالة كابرس رويال2017
طلبته منه وقال خذه .
( واخوي الكبير على فكرة أخلاق حبووب وسمح ولسانه طاهر ومايسب أبد.
الا اذا كان ذاك اليوم سكران في الملحق فهو يلعن )
وصرت كل من شفته علمته اني بموعد غزلنجي.
وعلى بالي راعي غزل ووخر عن دربي .
أتى المغرب الموعود ودخلت عتيقة .
وقفت بالمكان اللي أتفقنا عليه دقيت وجت فراوله تمشي وركبت
طبعا لا غنى عن نصائح كوماندز رحت موقف في حواري عتيقة الظلماء الضيقه
( أحم احم )
قلت :فرواله شيلي الطرحه سمعت ضحكتها بقمة الحياء دخت بس مسكت نفسي .
شالت الطرحه قالت: شووووف قلت: من جد فرواله شيلي الطرحه ماحد فيه .
قالت : لا تستهبل لؤي أنا شايلة الطرحه شوووف زين
ناظرت طالعت تمقلت ماشفت شيء.
يوم ابتسمت لي وشفت (ضروسها) دريت انها شايلة الطرحه صدق.
معقولة فرواله كذامعقولة هذي اللي قصدت فيها عشر قصايد.
معقولة هذي فرفراللي دفعت 5 آلاف فواتير فدوة لها .
مابينها وبين الكفر حق السيارة فرق اللهم ان الكفر فيه صواميل
قلت: حبيبتي فراوله ترانا (غرزنا) ممكن تدفين الموتر.
قالت: غرزنا في زفلت قلت بعصبيه وانا حاقد عشان فلوسي اللي طارت.
إيه غرزنا قومي دفي عشان اطلع السيارة ونروح لا احد يشوفنا ويشتبه فينا .
هي نزلت ولا ما نزلت رحت دايس البنزين وناصي كوماندز ولعنت خامس جدفه .
قال: وش دخلني قلت: الله يلعن الغزل والمغازل وخرابيطك كلها .
قال عادي تصير في اكبر العايلات اليوم كفر بكرة تلقى قمر .
قلت خل الكفر والقمر لك وتووووووووووووووبه .
__________________
حكمة العدد :
اذا رأيت في السوق امرأة وأعجبتك فأذكر لؤي واهرب:k:
_____________________________
(الفصل الأخير )
وهو أهم فصل .
قبل لايجيني واحد منكم مدرعم ومطفي النور .
ومشغل السكن ويشربك بالبوري ويمشي 180 .
ويطب فيني ويقول: يافاسق تجاهر بمعصيتك ومن هالكلام .
أحب أقوله: هد السرعه لاعدمتك لا تروح في الصبه ثم نبلش بك.
يالربع انا أوردت هالقصه الخرافيه اللي أختلقتها من بالي عشان شيئين
1 – للشباب :
ترى الثقل زين مو كل ما شفتوا عباية مخصرة وعيون مكحلة درعمتوا ورااها
ترى المثل يقول : ياما تحت السواهي دواهي وياما تحت البراقع فواقع
ولا تصدقون ان الغزل فيه سعاده ترى مافيه الا الشقاء
قريت قبل كم يوم عن شاب متعلق ثلاثة أشهر ببنت في شات كتابي .
ثلاثة شهور وهو يحب وفي الأخير صارت البنت رجال متنكر .
يعني ركوووووود ركوود ترى الزعيم موجود
2- لأخواتنا البنات
ترى عباية الراس رووعه قمة الحشمه والاحترام تحفظين بها نفسك وغيرك.
عباية الكتف واللثمه والخرابيط اللي من تالي مو عبايات .
لأن ما عمر الزينه غطت زينة .
تقبلوو تحياتي
اخوكم…………………………….. ولد الحفر
هههههههههههههههههههههههههههههههههههههههههه
هع هع هاااااااااااااااااااااااااااااااااااااااااااع
آآآآآه آآآآآآآآه
ههههههههههههههههههههههههه
خلووووووووووووووووووووووف
واااااااااااههههههههههههههههههههههههههههههها
البيت كله صحى من ضحكي
الله يرجك قول آآآآآآآآآآآآآآآآآمييييييييييييييييييييييييييين
تبي تنصح الخلايق على حسابي يادووووووووووب
اجل خليتني كويحه ؟؟
واتكحل من ابو ريالين ؟؟
وصايعه البس عباية كتف ومخصررررررررررره ؟؟؟
الله ينتقم منك …
<<<< تمزح تمزح
هع
وترا عندي فوائد
خليك تتنظف كول يوووووووووووووووووم ..
مغسي بكووووووو يادوووووووووب
قوصه م اجوووووووووووود ن
وكلها عبر لمن لم يعتبر ,,,
<<<<<<< دمووووووووووع من الضحك
اضحك الله ضرسك …
بس حلو المخرج حقك
ادف السياره هاه ..؟؟؟
<<<< طيوبه بكل حالاتي هع
عالاقل مانصبت عليك باسمي ..
اجل لؤي !!!!,,,خخخخخخخخخخخخخخخخخ
اما كوماندز ,,,
هههههههههههههههههههههههههههههه
<<< زير نساء <<<< بتتصفق
والله سوالفك سوالف يا ولد الحفر
تستاهلووون يالتماسيح
محد قال لكم تتحرشون
الله عطاكم على قد نيتكم
هههههههههههههههههههههههههههههههههه
مسكينه فرفر طاحت بيدك ههههههههههههههههههههههه
فرااااااااااااااااااااولة طيحتي الولد امممممممممممممممممممم
الله يستر منك اليوم فراولة اجل بكرة مين
الله يرجك رجا مبرحا شديدا
بجد قصة يجب اخذ العبرة منها لانها واقعية تصير
يعطيك العافيه
تحيااااااااااااااااااااااااااااااااااتي
اجل ادف السياره ؟؟؟
ايعقل هذا الشي …؟؟؟؟
<<<<وااااااااااااااااااااااااااااااع
حلوه 
>>>>>>> ميته ضحك
كل هذا يطلع منك ياخلوف …. يسلمو على هيك دعابه
والحكمه من القصه روووووووووعه
تحيااااااااتي
هع هع هع هع هع هع هع هع هع هع هع
محشومه يادوووبه انتي قمر
واحلى مافيك انك مطيعه خخخخخخخخخخخخخخخخخخ
واحتمال تكون اخرر قصصي فيك هذي خخخخخخخخخخخخخ
وعلى فكره سنونك رووعه خخخخخخخخخخخخخخخخخخخخ
يسلموو على مروورك ياقمر يافرواله يافرفر خخخخخخ
تقبلي تحياتي
ههههههههههههههههههههههه
يسلموووووو فدك على المرور العطر
تقبلي تحياتي
هههههههههههههههههههههههههههه
هههههههههههههههههههههههه
ههههههههههههههههههههه
هههههههههههههههههه
هلاااا والله وغلووووووووووو بدلع قطر
نورتي الصفحه خخخخخخخخخخخخخخخ
وش نسوي دلع المقرووود كوماندز قالي تحرش
ولا انا عاقل خخخخخخخخخخخخخخخخخخخخ
مشكووره على مروورك الجميل
تقبلي تحياتي
