الوسم: الحوت

أول مره أمر من عندكم فيذاا وقلت بشارك معكم وببربس بالحتسي بربسه

مقدمة :

ارخي الريال ويسترخي كل مزيون ….. قرش يجيب الطير ماهو خسارة <—- انطم

<—- امحق شعر انت وجهك ماعلينا ….

اهداء ….

هذا الموضوع إهداء لكل من ضاقت به الدنيا و تردت به الحال .. لكل من تخلى عنه المجتمع فتبنته القذارة والطماله ..

لكل مضطهد اعتاد على ان يناديه الأخرين "يا الدبشة" . .

واخيرا إهداء لجميع الأخوه الزملاء القائمين على مستشفى الأمراض العقلية

الموضوع <—- قفلوا الاتصال من اللحين عشان ما تتفوترون

مثل نهاية كل سنه دراسية .. سقطت .. وش فيكم مستغربين .. أي نعم .. سقطت .. لكن هالمره السبب موب مني .. السبب من ابوي .. أي نعم .. ابوي ..

ابوي اللذي هتك نجاحي واتلف مواهبي .. ابوي اللذي جردني من إنسانيتي واستنزف ذكائي و رجولتي ..

ابوي اللي طول عمره يعاملني بمعاملة تصطبغ بصبغة الترهيب والتحقير والتسفيل .. أي نعم .. التسفيل

<—– كل تبن .. أي نعم .. كل تبن !!

رجعت للبيت ادربي راسي بشهادتي المزرية .. والقى ابوي جالس في الحديقه يرمقني بنظرات الحنان الأبوي ..

حبيت راسه وارتميت في حضنه مجهشا في البكاء .. قال لي وهو يطبطب على ظهري:

اتز اوكيه ماي صن .. دونت كراااي بليييز !! ..

مسحت خشتي بالكرفته حقته ثمن تنهدت قائلا:

أي لوف يوو دااادي .. دونت لييف مي الوون بلييييز !!

<—- ماااش .. ودي احسسكم اننا أسره متحضرة بس خايف اتسبب في زعزعة العلاقات الثنائية ..

لذلك و درءا للحروب الأهليه بكون صريح معكم واعيد لكم المشهد اللي راح بكل مصداقية ..

نعيد المشهد من جديد

رجعت للبيت والقى ابوي جالس في الملحق يرمقني بنظرات حارقه والعقال متشبث في يده قائلا بغضب: طبعا كالعادة سقطت يا الدبشة ..

انا ابي اعرف غباءك ذا طالع على مين .. يعنبوك ربيتك احسن تربية وعلمتك احسن تعليم و لا فاد فيك ..

صرفت عليك دم قلبي الليين كبرت وكبر خشمك معك وصرت اصرف عليكم الاثنين ولا فاد فيك .. إلى متى بتصير عاله علي يالدلخ .. إلى متى قل لي ؟؟

جيت براضيه واحب يديه ما دريت الا وهي ترتفع بالعقال شاهقه ثمن تلزخني على شفايفي العجرمية ..

عقبها توالت الضربات الترجيحية على كاهلي و تبعتها كلمات الوالد الطاعنه:

ما منك نفع ابد يا الفاشل .. لكن إنشاء الله بكره تجي مرت ابوك تربيك صح يا عديم التربية !! ..

قلت له بنبرة الملحوس : أي مرت ابو ؟؟

رد علي :

مرتي انا يالدبشة .. زواجي إنشاء الله بكره .. و زوجتي بتجي تسكن في هالبيت مع عيالها .. و ياااااويلك لو تضايقهم بكلمة او يشتكون لي منك . . سامع يالدلخ !! ..

قلت بصوت مجروح :

يبه لو سمحت احترم احساسي المرهف و لا عاد تقول لي دلخ تراني مجموعة إنسان و ازعل بسرعه ..

وبعدين بأي حق تتزوج وانت عارف اني رافض فكرة زواجك على امي !! ..

رد علي متخللا حديثه بضربات العقال المتوالية :

شرهك عاللي بياخذ رايك في زواجه يالساقط .. رح خذ شناطك واقضب الباب ولا ابغى اشوف رقعة خشتك في هالبيت الا إذا اقتنعت بعائلتي الجديدة ..

سامع يا الهيس .. يلا اذلف براااااااا !!

طلعت من البيت متورم الشفايف والدموع تنهمر على وجنتي الوردية وذكرى الإضطهاد تطعن قلبي مرارا وتكرارا ..

جلست في العراااء أكل فتات خبز وانام على قشر جح ..

جلست افكر في وضعي المهني .. افكر في مستقبلي وش بيصير عليه .. افكر بالحل الجذري اللي يرتقي بحياتي للأفضل ..

جلست افكر وافكر واضغط على مخي اللييييين لقيت فكرة عقبها اغمى علي و طحت غشيان

قمت الصبح أحاول أتذكر الفكرة ما قدرت لأن مخي كان خارج التغطية !! .. <—– كان ولا زال

مشيت في الشارع مهدود الحيل .. مكسور الجناح .. ادور على حبل النجاة اللي ينتشلني من الضياع ..

فجأه تذكرت صديق الرخاء والشقاء .. صديق الدهاء والغباء .. صديق البلاء والوباء ( دغيمان ) ..

بعدها على طوول وقفت تاكسي وادز للبطحا .. و حنا في الطريق جلست اسأل السواق عن ارباح التاكسي ..

اثر ذا التكاسي يكدون خير وحنا يا غافلين لكم الله .. عيال الذين حتى بعد ما رخص البنزين مازالوا ماسكين على اسعارهم !! ..

و بعد تمحيص إقتصادي دقيق .. جازت لي شغلة التاكسي و قررت اخوضها من أوسع ابوابها ..

بس المشكلة لازم أفكر شلون اجيب فلوس التاكس.. أوووووووعععع <<< صوت كعة الفرامل بعد ما طحت غشيان على كتف السواق…..