الوسم: الدمعه

الدمعه اللي لي اسبوعين خانقها
. . . . .طاحت قصيدة غرام بقروح مرثيه

وانا بدل ما أمسح الدمعات أوثقها
. . . . .عسى دموعي تخفف حر مافـيه

لو كل الأحلام نحلمها نحققها
. . . . .ماكان شفت الفراق وجبت طاريه

فارقت مجبور مافكرت أفارقها
. . . . .لاشك حكم القـدر مايـعرف النيه

من قبل لا أحب ضحكتها وأرافقها
. . . . .من قبل نار العنى تطغى على الفيه

يوم ان شمس المعرفه لاح بارقها
. . . . .حسيت فيهـا دلع طيبه وعفويه

وبديت أرتب من أبياتي وأذوقها
. . . . .وأقول من ذوقها ماهي طبيعيه

لين سرقتني غلا وأصبحت سارقها
. . . . .وبدا غلانا يـزود شويه شويه

شهرين لين استوت فيني مطارقها
. . . . .وقيمة شهر من غلاها دور حوليه

ونكست كل البيارق من بيارقها
. . . . .وتفنى بيارق غرام لعين مهويه

صارت تشفق لوصلي وأتشفقها
. . . . .ونبادل الحب حنيه بحنيه

لكن ردى الحظ ضايقني وضايقها
. . . . .يوم ابتدت قصة الحزن الحقيقيه

يوم اشتكت والبكى والدمع يغرقها
. . . . .وبان الخبر !! ياهي الأقدار مخفيه!!

قدرت أخفف حزن روحي وأروقها
. . . . .محروق لكن بكاها زادني كيه

وصدقت في حاجة ماكنت أصدقها
. . . . .كيف الأوادم تموت وبعدها حيه

أو كيف تفلت من يديني وانا أعشقها
. . . . .أو كيف تعشقني وتفلت من يديه

أو كيف ابن عمها يقدر يعلقها
. . . . .ياعل ابن عمها تفنى مساعيه

تأخيرها حاجة ماكنت طـايقها
. . . . .وشلون أبتحمل الروحه بلا جيه

وشلون أبلقى بهالأرض ومناطقها
. . . . .من فيه عقل الملاك بحسن حوريه

منهو يعوض خفوقي حسن منطقها
. . . . .منهو يزيد الحكي لمسات سحريه

يوم أتبلى على نفسي وأضايقها
. . . . .تقولي ياعل مافيك يحصل فيه

ماني بقاوي عقب هذي مفارقها
. . . . .ولانيب ناقـص تعب والروح مبليه

ولاني أناني وأقول الله يوفقها
. . . . .وأحيان من حبها كلي أنانيه

ياعل منهو فرح فيها يطلقها
. . . . .حتى ترد ونعيش أحلام ورديه

حتى ولو ماتجي بـيدي وأطوقها
. . . . .أقلها ماتمسي ماهي بليه

والكلمه اللي بتحرجني وأبنطقها
. . . . .ماينفع البدو حب بدون حريه

ولو الرجل ماتهزه بنت عاشقها
. . . . .ماكن دمعي يطيح لخاطر بنيه

مما رااااق لي

تريث ياصدى صوتي وخفف نبرة الأحزان
تعلم من نزيف الجرح كيف اصبر على همي

أنادي والسما غيمة تثور بداخلي بركان
ودفتر من قصيد الأمس على جال البحر مرمي

سكنتك بيت ياكبره وشكلت بسماك ألوان
شربتك كاس بيديني وأثاري الكاس من سمي

دخيلك جامل الدمعه !! ترا مهما أكون أنسان
مشاعر قلب تحكيني وأزود حبرها دمي

كرهت البيت بغيابك ! كرهت الباب والجدران
ليامن شفت لك صورة تنسيني حنان أمي

أبرحل وأترك الماضي وأجدد حاضر العنوان
ابجمع من شتاتي قلب واسافر في بحر غمي

تصور لو نساني الكون وصرت بعالم الحرمان
أناديلك .. واصوت لك .. ولاحتى تلد يمي

أمانه لو جعلتني مسافر في سما النسيان
أمانه جاوب صوتي لجل ما يحترق دمي

ابي لو ساعه من وقتك .. أنا ماقلت أبيك ازمان
أبيك العاشق المغرم على قلبي ومهتمي

على هونك ظلام الليل .. أشوف الليل ماقد حان
علامك تلوي ذراعي تبعثر فيني وتلمي

حرام تشوف دمعاتي وتنسى أني بقايا أنسان
أحاول اجمع شتاتي وعجزت اليوم في لمي

حبيبي لو تبيني ابعد و اعانق دفتر الكتمان
تعال احضر [ عزا قلبي ] مادام الشوف منعمي

تصور مابقا فيني سوى باقي رمد بركان
ودفتر من قصيد الأمس على جال البحر مرمي