ما مرتاح .. ما مرتاح .. مامرتاح
عيوني تستحي بس الدموع إوكاح
ما مرتاح
منك.. مني .. من الجاي من الراح
ما مرتاح
عركه وي الزمن ورجعنه مكسورين !!
وبعيده المسافه وينسي اللي طاح ..
ما مرتاح
لأن شفت الشمس نزلت تبوس الكاع
وبكف الطفل تنلاح
ولأن قاضي البلابل مدد التوقيف
ومفتوحه السما
والفيل عنده جناح
ما مرتاح
لأن قفل المحبه إنباك
وترهم عليه مفتاح
ما مرتاح
متروك بجزيره وتيهت بالليل
وإجو ربعي عليه بقافلة أشباح
وإنته إشبيك ؟؟؟؟؟
لمن دافعت عن نفسي صابك غيض
مو حتى الكنافذ من تحس بالخوف
تستخدم جلدها سلاح !!
ولا جن الفجر مثل الفجر محبوب
لون الفجر صاير يقبض الأرواح !!
ما مرتاح من ربعي ولا مرتاح
تمساح إبنهرهم صاحو من الخوف
وجازفت بحياتي من سمعت إصياح
!!! صارعت المنيه وبيده هزني الموت!!!
ومدمى إطلعت :-
صفكو للتمساح
كل هذا وتريد أرتاح
ما مرتاح
ما مرتاح من ربعي ولا مرتاح
نادووني.. وركضت إبليل
إيد الرسن بيها وإييد بيها سلاح
عثرت مهرتي … وربعي قبل ما طيح
واحد كال للثاني
أبشرك طاح
أبشرك طاح
*****
يا وطنا
ياو طنا
يلي بيك احنا انولدنا
ومن ثدي دجله اوفرات اشكد رضعنا
ياوطنا… شكثر بربوعك كعدنا
ومانسينا… شكثر فوك ترابك المحبوب نمنا
ومن نسمعك تندب انت او تستغيث
ايزود ويغركنا همنا
لجل حزنك ياعراق احنا حزنا
ومادرينا… ذياب يبلادي الغزتنا
ومادرينا… شلون باكوها شمسنا
ياعراق…. سنين ضاعتبين حسرة وآه ومصايب جرعنا
ومايفيده ضماد لا لا
ولايفيده الشد جرحنا
وهذا حدنا
كافي ذله
وياهو بالعالم جرع ذله مثلنا
شلون ننذل
وحنا من حسين جم ثورة اقتبسنا
وهذا حدنا
اليوم يعراق انتبهنا
اليوم اجينا امسلحين
وبسم ابو السجاد نهتف
عالي ايرفرف علمنا
زلمك احنا
…او مايهمنا الموت لجلك مايهمنا
ياوطنا
…لجلك اتهون الحياة
او لجلك انضحي بعمرنا
عهد منااولازم انوافي ابعهدنا
ياعراق….
.مانساوم بيك بس انت املنا
رجالك احنا امحزمين
او موت بالعزة كصدنا
لازم انحرر ربوعك
ونسكي اشجار المحنةابفيض دمنا
شلون نغفى
وانت يابو الخيرمحروم المحنه
شلون تغمض عينااويطبك جفنا
ونت بين اعداك يعراقي ذليل
عيب نومتنه ابمذله
شلون وعلى الذله نمنا
ماهو عيب الجان هاجرنا وبعدنا
العيب كل العيب
لو يسكت تفكنا
وعار كل العار لو يخلص فشكنا
ياعراق…
لاتصيح ارجالي وين
احنا كبل الصيحه شدينا حزمنا
ومايهمنا
…حت لو ميت الف طاغي اويزيد
يعود بيك
نسير ونواصل هدفنا
حتى لو كل احنا متنا
لجن من نسمع ابصوتك تستغيث
انكوم ونشكك جفنا
ياعراق
لازم ايطر من بعد ليل الظلم بالعز فجرنا
ولازم غيوم الظلاله
انزيلها او تطلع شمسنا
ياعراق…
ارجالك احنا
مانهم لو الف بركان اليفجرونه ابدربنا
لازم انحقق هدفنا
لازم انحقق هدفنا
*****بغداد
بغداد يمكحله يم ركبة الحلوه
مبيوك ليش الفرح من شفتج كوه
***
بغداد نجمة صبح وإلليله دخلتها
إكحيله وشبكها الهوه ونام وي كذلتها
***
بغداد ليش إبدمع تتطرز إخدودج
مو إنتي أم الفرح منهو الكسر عودج
***
بغداد شهكة محب فز ولكه أحبابه
وتحمرت شفتج بالدم يحبابه
كوليلي يمته الفرح يفتح لج أبوابه
***
جبنا إلج إلزفتج حنه و ورد وبخور
شفناج حزمة ضوه ومطعمه إبلور
طلقه وعشكها الزمر بس تبتسم له إيثور
وإشمحله عرس التفك لو هلهل الشاجور
***
بغداد ضحكة شمس!! بغداد هلهوله
بغداد ليش الدمع صاير إلج سوله
كوليلي شنو هالصبر جا خلكج إشطوله
***
بغداد إنتي الأمل !! بغداد إنتي الحيل
لازم يجيلج صبح مهما يطول الليل
*****بعدني بخير
بعدني ابحيل يتلاوه الحديد وياه
بعدني ابعين المحبين شاب هوايه تتمناه
بعدني مقدر ومحسوب بين الناس صاحب جاه
بعدني مشجل ابحيلي ولا فد يوم اكولن اه
بعد ما رجفن اضلوعي ولا بالجله اكول اشاه
بعد ما ذبني وكتي ولا لذت بحماه
بعدني وما عثر جدمي شجاكم صحتوا حيل وياه
الف وسفه وصلنه الهل وكت وبعينه شفناه
بعد ماكو محنه ولا اخو التنخاه
ولا ابن الوفي للخلفه ورباه
ولا صاحب صديج تامن ابممشاه
صدك يمشي النمل للدبك يتعناه
وصدك يتخربط الموزون من تمشي عكس دنياه
وصدك شدة النار اتفسر المكلاه
وصدك ولية خنيث الدنيه للتولاه
بس البيه عزم ما تنثني يمناه
يحسب للقدر وبحيله يتلكاه
بعدني هنا …. بعدني بخير
عايش والحمد لله
*****
آنه بس ارد افتهم
شنهو هذا
هاي عيني تشوف لو آنه بحلم
شهالحلاة شهالجمال شهالانوثة شهالغزال المبتسم
انت لوحة انت صورة البلخيال وتنرسم
انتي يا نصب الجمال و بيك كل معنى واسم
انتي هم من طين مثلي وماي مخلوقة وجسم
انا بس ارد افتهم
انتي رحلة شوق بقلوب الزلم
انتي سالوفة وحجي الماينكتم
إتكلي شوف
شبيه عيب انا بس ارد افتهم
بيه شي المنثلم
وارد واصفن
عمي بس طرقاعة انت
شوصف بجسمك شذم
ملحك من الراس يفتل للجدم
انت وسفة تمسك كفوف وعلى شفافك شوارب تلتحم
انت سر الحسن عندك واليقرب ينرجم
شلون جرك حبل راعي
انا بس ارد افتهم
ودوم ما راح افتهم
*****